وزیراعلیٰ خیبرپختونخوا محمود خان اور گورنر خیبرپختونخوا شاہ فرمان نے شمالی وزیرستان کے علاقے رزمک میں فوجی قافلے پر حملے پہ افسوس کا اظہار کیا ہے۔

تفصیلات کے مطابق وزیراعلیٰ خیبرپختونخوا محمود خان نے اپنے ایک بیان میں شمالی وزیرستان کے علاقے رزمک میں فوجی قافلے پر حملے کی مذمت کی۔

اپنے بیان میں محمود خان نے فوجی جوانوں کی شہادت پر افسوس کا اظہار کیا جبکہ متاثرہ خاندانوں سے دلی ہمدردی کا بھی اظہار کیا۔

وزیراعلیٰ خیبرپختونخوا محمود خان نے کہا کہ ملک وقوم کے تحفظ کیلئے پاک فوج کی قربانیاں لازوال ہیں، ملک و قوم کی سکیورٹی پر مامور اہلکاروں کو دہشت گردی کا نشانہ بنانا ایک غیر انسانی فعل ہے۔

دوسری جانب گورنر خیبرپختونخوا شاہ فرمان نے بھی شمالی وزیرستان میں سیکیورٹی فورسز کے قافلے پر دہشتگردانہ حملے کی شدید مذمت کرتے ہوئے حملے میں آفیسر سمیت جوانوں کی شہادت پر رنج و غم کا اظہار کیا۔

گورنر خیبر پختونخوا شاہ فرمان نے کہا کہ پوری قوم دہشتگردی کے خلاف جنگ میں سیکیورٹی فورسز کی قربانیوں کو قدر کی نگاہ سے دیکھتی ہے جبکہ امن و امان کے قیام میں سیکیورٹی فورسز کی خدمات اور لازوال قربانیاں لائق تحسین ہیں ۔

 یاد رہے اس سے قبل پاک فوج کے شعبہ تعلقات عامہ (آئی ایس پی آر) کے مطابق شمالی وزرستان کے علاقے رزمک کے قریب سیکیورٹی فورسز کے قافلے پر دہشت گردوں نے آئی ای ڈی حملہ کیا۔

اپنے بیان میں ترجمان آئی ایس پی آر کا کہنا تھا کہ دہشت گردوں کے حملے میں ایک افسر سمیت پانچ سیکیورٹی فورسز اہلکار شہید ہوگئے۔

ترجمان آئی ایس پی آر کا مزید کہنا تھا کہ شہداء میں 24 سالہ کیپٹن عمر فاروق، 37 سالہ نائب صوبیدار ریاض احمد، نائب صوبیدار شکیل آزاد، حوالدار یونس خان، نائیک محمد ندیم شامل ہے۔