پاکستان میں برطانوی ہائی کمشنر ڈاکٹر کرسچن ٹرنر وزیر اعظم کے مشیر برائے احتساب اور داخلہ بیرسٹر مرزا شہزاد اکبر سے دفتر میں ملاقات کی۔

تفصیلات کے مطابق وزیر اعظم کے مشیر برائے احتساب و داخلہ نے برطانوی ہائی کمشنر ڈاکٹر کرسٹین ٹرنر سے ملاقات میں  وزارت داخلہ کے حوالے سے باہمی دلچسپی کے امور پر تبادلہ خیال کیا گیا۔

میٹنگ کے دوران ری ایڈمیشن ایگریمینٹ اور ایکسٹراڈیشن ٹریٹی کے متعلق تفصیل سے تبادلہ خیال ہوا جبکہ پاکستان اور برطانیہ کے مابین ملزمان کے تبادلے کے معاہدے کو منطقی انجام تک پہنچانے کیلئے تعاون پر اتفاق ہوا۔

 میٹنگ میں  کہا گیا کہ مذکورہ معاہدوں پر جلد از جلد عمل درآمد کے لئے پاکستان اور برطانیہ کی حکومت مل کر کام کرے گی۔

واضح رہے اس سے قبل برطانوی ہائی کمشنر کرسچن ٹرنر نے شمالی علاقہ جات کا دورہ کیا تھا۔

اپنے جاری کردہ پیغام میں کرسچن ٹرنر کا کہنا تھا کہ یہ میرا شمالی علاقہ جات کا پہلا دورہ ہے، یہاں کے مناظر اور پہاڑ بہت خوبصورت ہیں، یہ خوبصورتی ساری دنیا میں مشہور ہے، یہاں بھی موسمی تبدیلی ایک بڑا چیلنج ہے۔

برطانوی ہائی کمشنر کا مزید کہنا تھا کہ موسمیاتی تبدیلی سے نبرد آزما ہونا ہم سب کے لیے ضروری ہے، یوکے ایڈ پاکستان کے شمالی علاقہ جات میں مختلف پراجیکٹس پر کام کر رہی ہے، ان میں مقامی آبادی کے ساتھ مل کر موسمی تبدیلی کا مقابلہ کرنا بھی شامل ہے،یوکے ایڈ پاکستان کے شمالی علاقہ جات میں ہنگامی صورت حال اور سیلاب سے بچاو کے لیے بھی امداد فراہم کر رہی ہے۔