وفاقی وزیر اطلاعات سینیٹر شبلی فراز نے کہا ہے کہ ملکی معیشت کی بہتری اور معاشی مسائل کا حل ہماری پہلی ترجیح ہے۔

تفصیلات کے مطابق وفاقی وزیر اطلاعات سینیٹر شبلی فراز کی سی پی این ای کے عہدیداران سے ملاقات ہوئی جس میں نائب صدر سی پی این ای عامر محمود نے وزیر اطلاعات کو  میڈیا صنعت کو درپیش مسائل سے آگاہ کیا۔

وفاقی وزیر اطلاعات نے کہا کہ آج میڈیا کے شعبہ سے وابستہ افراد سے ملاقاتوں میں انکے مسائل سے بخوبی آگاہی حاصل کی جبکہ صحافتی برادری سے ان کے مسائل حل کرنے کا عہد کیا ہے اور میں یقین دلاتا ہوں کے بہت جلد آپ کے مسائل حل ہوں گے۔

سینیٹر شبلی فراز نے یہ بھی کہا کہ ملک میں قانون کی حکمرانی چاہتے ہیں جبکہ ملک میں اپوزیشن کی جانب سے غیر یقینی صورتحال پیدا کرنے کی کوشش کی جا رہی ہے۔

وفاقی وزیر اطلاعات کا کہنا تھا کہ وزیراعظم کے اکنامک آﺅٹ ریچ انشیٹو کے تحت وزارت اطلاعات و نشریات بیرون ممالک پاکستان کے مثبت تشخص کو اجاگر کرنے اوررزمبادلہ بڑھانے کے لئے فلم میکرز ، براڈ کاسٹرز اور فنکاروں کی حوصلہ افزائی کے لئے کانفرنس کا انعقاد کر رہی ہے۔

سینیٹر شبلی فراز کا یہ بھی کہنا تھا کہ پاکستانی معیشت کے عشاریئے مثبت ہیں،کرنٹ اکاؤنٹ خسارے میں واضح کمی آئی ہے،معاشی سرگرمیاں تیز ہو رہی ہیں جبکہ تعمیراتی شعبے میں زیادہ سرگرمی دیکھنے کو مل رہی ہے،تعمیراتی صنعت کی ترقی روزگار کی فراہمی کا باعث بنتی ہے۔

شبلی فراز نے کہا کہ فلمیں کسی بھی معاشرے کی اقدار اور ثقافت کو اجاگر کرنے کا مؤثر ذریعہ ہوتی ہیں، اکنامک آﺅٹ ریچ انشیٹو ملکی معیشت میں بہتری اور ترقی کیلئے کارگر ثابت ہوگا۔

وفاقی وزیر اطلاعات سینیٹر شبلی فراز نے مزید کہا کہ ملکی معیشت کی بہتری اور معاشی مسائل کا حل ہماری پہلی ترجیح ہے اور توجہ ہٹائے بغیر معاشی ترقی کے ایجنڈے کو آگے لے کر بڑھتے رہیں گے۔