حکومت سندھ نے کراچی سمیت سندھ بھر میں چہلم امام حسینؓ  کے موقع پر موٹر سائیکل کی ڈبل سواری پر پابندی عائد کردی۔

تفصیلات مطابق محکمہ داخلہ سندھ کی جانب سے جاری کردہ بیان میں کہا گیا ہے کہ چہلم امام حسین پر ڈبل سواری پر پابندی ہوگی جبکہ پابندی کا اطلاق آج رات 12 سے 24 گھنٹے کے لیے ہوگا۔

محکمہ داخلہ سندھ کے بیان میں مزید کہا گیا ہے کہ صحافی، پولیس، امن و امان برقرار رکھنے والے اداروں کے اہلکار، 12 سال سے کم عمر بچے خواتین اور بزرگ پابندی سے مستثنی ہونگے۔

یاد رہے کہ چہلم کے موقع پر ڈبل سواری پر پابندی کا نوٹیفکیشن محکمہ داخلہ نے گزشتہ ہفتے جاری کیا تھا۔

واضح رہے کہ یاد رہے اس سے قبل کراچی ٹریفک پولیس نے چہلم امام حسین  کے جلوس سے متعلق روٹ پلان جاری کردیا۔

ترجمان ٹریفک پولیس کے مطابق 20 صفر ،8 اکتوبر کو مرکزی جلوس نشتر پارک  سے دوپہر ایک بجے برآمدہوگا، مرکزی جلوس  سے قبل صبح 9 بجے مارٹن روڈ شاہ نجف امام بارگاہ سے علم کا جلوس برآمد ہوگا۔

ترجمان کا کہنا ہے کہ علم کا جلوس نشتر پارک  پر اختتام پذیر ہوگا جہاں مرکزی مجلس منعقد ہوگی، مرکزی مجلس کے بعد جلوس برآمد ہوگا،  مرکزی جلوس روایتی راستوں سے ہوتا ہوا حسینیہ ایرانیاں امام بارگاہ کھارادر پر اختتام پذیر ہوگا۔