پاکستان کے نامور اداکار عمران عباس نے ٹک ٹاک پر پابندی کو خوش آئند قرار دے دیا۔

اداکار عمران عباس نے بھی اپنے انسٹا گرام کی اسٹوری پر ٹک ٹاک کے حوالے سے تبصرہ کیا ہے۔

عمران عباس نے اپنی انسٹا گرام اسٹوری پر خوشی کے آنسوؤں والی ایموجی کے ساتھ لکھا کہ 2020 زیادہ برا نہیں ہے۔

اداکار کے اس پیغام اور لکھنے کے انداز کو دیکھ کر اندازہ لگایا جاسکتا ہے کہ عمران عباس پی ٹی اے کے اس اقدام سے کافی خوش نظر آرہے ہیں۔

یاد رہے کہ پاکستان ٹیلی کمیونیکیشن اتھارٹی (پی ٹی اے) نے عوامی شکایات پر ویڈیو شیئرنگ ایپ ٹک ٹاک ملک بھر میں بند کردی۔

پی ٹی اے ترجمان کے مطابق پاکستان میں ٹک ٹاک ایپ بند کرنے کا فیصلہ غیر اخلاقی مواد کے باعث کیا گیا ہے۔

ترجمان کے مطابق ٹک ٹاک غیر اخلاقی مواد روکنے میں ناکام رہا، جس کے باعث اسے ملک بھر میں بند کرنے کا فیصلہ کیا۔

پاکستان ٹیلی کمیونیکیشن اتھارٹی کی جانب سے ٹک ٹاک پر پابندی لگائے جانے کے باعث جہاں بہت سے لوگ غم و غصے کا اظہار کر رہے ہیں وہیں کچھ لوگ اس پر خوشی بھی محسوس کر رہے ہیں۔

معروف ٹک ٹاک اسٹار جنت مرزا نے بھی ٹک ٹاک پر پابندی کی حمایت کردی ہے۔

جنت مرزا نے بتایا کہ میں جاپان میں موجود ہوں اور اس ہی دوران مجھے پاکستان سے ٹک ٹاک پر پابندی کی خبر موصول ہوئی ہے۔

اس حوالے سے ٹک ٹاک اسٹار نے اپنی رائے دی اور کہا کہ میں خود چاہ رہی تھی کہ پاکستان میں ٹک ٹاک پر پابندی لگے۔

انہوں نے کہا کہ مکمل ایس او پیز کے ساتھ ٹک ٹاک پر پابندی ہٹائی جانی چاہیے۔

جنت مرزا نے کہا کہ پاکستان میں ٹک ٹاک کی ٹیم ہونی چاہیے  جو ہر ویڈیو کو پوسٹ سے پہلے ریویو کرے۔

انہوں نے کہا کہ اس طرح ٹیلنٹ کو فروغ دینے میں بھی مدد ملے گی۔

دوسری جانب ٹک ٹاکر پری ڈول کا ٹک ٹاک پر پابندی کے خلاف بیان سامنے آیا ہے۔

ٹک ٹاک پر پابندی کے حوالے سے پری ڈول نے کہا کہ ٹک ٹاک پر پابندیہمارے لیے ایک بری خبر ہے۔

پری ڈول نے کہا کہ ٹک ٹاک پر پابندی لگانا اچھا قدم نہیں ہے۔

انہوں نے کہا کہ ٹک ٹاک پر چند لوگوں کی وجہ سے گندی پھیلی تھی اگر مسائل تھے تو صرف مخصوص اکائونٹ کو بلاک کرنا چاہئے تھا۔

ٹک ٹاک اسٹار پری ڈول نے کہا کہ دو تین سال کی محنت سے ٹک ٹاکرز نے اپنا نام بنایا  ہے پابندی کی وجہ سے ہماری محنت پر پانی پھیر دیا گیا ہے۔

واضح رہے کہ پری ڈول نے کہا کہ ٹک ٹاک پر سے پابندی ہٹائی جائے۔