امیر جماعت اسلامی سینیٹر سراج الحق نے کہا ہے کہ ہمارے حکمران اندر سے کچھ اور باہرسے کچھ اور ہیں۔

تفصیلات کے مطابق امیر جماعت اسلامی سینیٹر سراج الحق  نے اپنے ایک بیان میں کہا کہ آج کے زمانے میں بھی بڑے فرعون موجود ہیں لیکن جماعت اسلامی دیگر سیاسی جماعتوں جیسی پارٹی نہیں۔

امیر جماعت اسلامی نے کہا کہ دنیا میں ایک ارب 50 کروڑ مسلمان آباد ہیں جبکہ حکومت چاروں طرف سے مہنگائی کے کوڑے برسا رہی ہے۔

سراج الحق نے یہ بھی کہا کہ مہنگائی اور بد امنی میں اضافہ ہوگیا ، لاہور میں 78 روپے فی کلو آٹا ہے 110 روپے کلو چینی ہے۔

امیر جماعت اسلامی کا کہنا تھا کہ عمران خان ٹائیگر فورس بنانے کی بجائے اشیاء ضرورت کی قیمتیں کم کرے جبکہ انہی ٹائیگرز نے چینی اور آٹا کھایا ہے، کورونا فنڈ کھایا ہے۔

سراج الحق کا یہ بھی کہنا تھا کہ ہر حکومت ٹائیگر فورس لاتی ہے جو ملک کو لوٹتی ہے لیکن ہمیں ٹائیگر کی ضرورت نہیں، انسانیت اور اسلامی نظام کی ضرورت ہے۔

امیر جماعت اسلامی نے کہا کہ قیامت خیز اور ناقابل برداشت مہنگائی ہے، وزیر خارجہ کہتے ہیں ایف اے ٹی ایف کے 27 میں سے 21 نکات پورے کر دئیے۔

سراج الحق نے یہ بھی کہا کہ حکومت سے مطالبہ ہےدو سال پہلے والی اشیاء ضرورت اور ادوا کی قیمتوں کو بحال کرے۔

امیر جماعت اسلامی کا کہنا تھا کہ مولانا عادل کو قتل کرنے والے چاہتے پاکستان بھی شام لیبا اور عراق بن جائے جبکہ حکومت کا قصور ہے کہ ظالم کا ہاتھ نہیں روکتی۔

سراج الحق کا یہ بھی کہنا تھا کہ فرقہ ورانہ آگ بھڑکائی گئی ہےجسکے نتائج خطرناک ہو سکتے ہیں جبکہ پاکستان سے محبت کرنیوالوں کو مل بیٹھ کر فرقہ وارانہ آگ کو ٹھنڈا کرنے کی ضرورت ہے۔

امیر جماعت اسلامی سینیٹر سراج الحق کا مزید کہنا تھا کہ جماعت اسلامی جلد مہنگائی کے خلاف احتجاج کرے گی جبکہ ایک چارنڈر آف ڈیمانڈ بنا کر عوام کو متحرک کرینگے۔