وزیر اطلاعات ، بلدیات و مذہبی امور سندھ سید ناصر حسین شاہ نے کہا ہے کہ عمران خان اداروں کو متنازعہ بنا رہے ہیں۔

تفصیلات کے مطابق وزیر اطلاعات ، بلدیات و مذہبی امور سندھ سید ناصر حسین شاہ نے اپنے ایک بیان میں کہا کہ جامعہ فارو قیہ مولانا ڈاکٹر عادل کی شہادت ایک افسوسناک واقعہ اور ایک بڑا سانحہ ہے۔

سید ناصر حسین شاہ نے کہا کہ مولانا عادل خان شہید نے فرقہ پرستی کے خلاف کاوشیں کیں اور ڈاکٹرعادل نے ماضی میں تمام علماءکو بٹھا کرشر پسندی سے بچایا۔

وزیر اطلاعات ، بلدیات و مذہبی امور سندھ نے یہ بھی کہا کہ مولانا عادل خان کا قتل ایک سازش ہے اور اس سازش  کو بے نقاب کیا جائے گا۔

ناصر حسین شاہ کا کہنا ہے کہ وزیراعلی سندھ مراد علی شاہ نے قاتلوں کی گرفتاری کی یقین دہانی کرائی ہے، ملک دشمنوں نے مولانا عادل کو شہید کیا ، قاتل جلد پکڑے جائیں گے۔

وزیراطلاعات و مذہبی امور ناصر شاہ کا مزید کہنا ہے کہ عمران خان اداروں کو متنازعہ بنا رہے ہیں جبکہ اگر ہم مہنگائی کا پوچھیں تو وفاقی حکومت کہتی ہے کہ این آراو مانگ رہے ہیں۔

یاد رہے کہ مولانا عادل جامعہ فاروقیہ کے مہتمم اور مولانا سلیم اللہ خان صاحب مرحوم کے صاحبزادے ہیں اور جامعیہ فاروقیہ شاہ فیصل کالونی نمبر چار 4 میں واقع ہے۔

قبل ازیں کراچی کے علاقے شاہ فیصل کالونی میں فائرنگ کا واقعہ پیش آیا تھا جس میں جامعہ فاروقیہ کے مہتمم کے شہید ہونے کی اطلاعات موصول ہوئیں تھیں۔