کین کمشنر پنجاب محمد زمان وٹو نے کہا ہے کہ چینی کی قلت دور کرنے کیلئے 1 لاکھ 51 ہزار 700 میٹرک ٹن چینی درآمد کی جا رہی ہے۔

تفصیلات کے مطابق کین کمشنر پنجاب محمد زمان وٹو نے اپنے ایک بیان میں کہا کہ پہلی کھیپ 25 ہزار میٹرک ٹن پر مشتمل ہے اور چینی کی پہلی کھیپ لے کر جہاز آج رات پورٹ قاسم پر اترے گا۔

محمد زمان وٹو نے کہا کہ یہ چینی ٹریڈنگ کارپوریشن پاکستان کے تعاون سے پنجاب کیلئے امپورٹ کی جا رہی ہے جبکہ ایڈیشنل کین کمشنر پنجاب سبط حسن شیرازی چینی وصول کرنے کراچی پہنچ چکے ہیں۔

کین کمشنر پنجاب محمد زمان وٹو نے مزید کہا کہ آج رات چینی کراچی پہنچنے کے بعد آئندہ دو سے تین روز میں پنجاب لائی جائے گی جبکہ چینی درآمد کرنے سے پنجاب میں یقینی طور پر چینی کی قلت میں کمی آئے گی۔

یاد رہے اس سے قبل چینی کی قیمت 100 روپے پہنچنے کے بعد درآمد کرلی گئی تھی۔

چیئرمین سیریل ایسوسی ایشن آف پاکستان نے بتایا تھا کہ پاکستان کی جانب سے چینی کی درآمد شروع ہوگئی ہے جبکہ چینی کی درآمد سے قیمت میں5 روپے فی کلو کمی کا امکان ظہار کیا گیا ہے۔

 اس ضمن میں نجی شعبے کی جانب سے 2 لاکھ میٹرک ٹن چینی کی درآمد کے معاہدے کر لئے گئے ہیں جبکہ حکومت نے نجی شعبے کو ڈیوٹی فری چینی درآمد کرنے کی اجازت دی ہے۔