بالی ووڈ کی معروف اداکارہ ثناء خان نے اسلام کی خاطر شوبز انڈسٹری چھوڑنے کا اعلان کردیا ہے۔

غیر ملکی خبر رساں ادارے کے مطابق بھارتی اداکارہ بگ باس سیزن 6 سے شہرت پانے والی پر ثناء خان نے بتایا کہ اب وہ اپنی زندگی انسانیت کی خدمت میں اور اللّہ تعالیٰ کے احکامات کے مطابق گُزاریں گی۔

ثناء خان نے سوشل میڈیا سائٹ انسٹاگرام پر اپنی زندگی کے نئے سفر سے متعلق ایک طویل پیغام جاری کیا ہے۔

یاد رہے ثناء خان نے ماڈلنگ، ڈانس اور اداکاری سے بالی وڈ میں اپنے کیریئر کا آغاز کیا تھا، اُنہوں نے سال 2012 کے بگ باس سیزن 6 میں بھی حصہ لیا تھا جہاں سےاُنہیں شہرت ملی تھی۔

ثناء خان کی مشہور بالی وڈ فلموں میں جے ہو، وجہ تم ہو، ممبےٹو گوا، ہلّا بول اور ٹوائلٹ  شامل ہیں۔

اداکارہ ثناء خان نے سماجی رابطے کی ویب سائٹ انسٹاگرام پر جو پیغام شئیر کیا ہے وہ انگریزی اور اُردو زبان دونوں میں شیئر کیا۔

تاکہ اُن کے سرحد پار مداح بھی اُن کے اس اہم فیصلے سے آگاہ ہوسکیں۔

ثناء خان نے اپنے پیغام کا آغاز اللّہ تبارک تعالیٰ کے نام سے کیا۔

بعد ازاں اداکارہ نے پیغام میں لکھا کہ آج وہ اپنی زندگی کے ایک اہم موڑ پر اپنے چاہنے والوں سے یہ بات کر رہی ہیں کہ اُنہوں نے ایک طویل عرصہ شوبز انڈسٹری میں کام کیا ہے۔

ثناء خان نے بتایا کہ اس دوران اُنہیں عزت، دولت، شہرت اور مداحوں کا بہت پیار بھی ملا جس کے لیے وہ ہر ایک شُکر گُزار ہیں۔

سابقہ اداکارہ نے کہا کہ سب کچھ حاصل کرنے کے بعد بھی وہ ایک کشمکش میں مبتلا ہیں اور بہت سے سوال ہیں جن کے وہ جواب جاننے کی کوشش کررہی ہیں۔

ثناء خان نے سوالیہ انداز اپناتے ہوئے لکھا کہ کیا ہماری زندگی کا مقصد صرف شہرت حاصل کرنا ہے؟

کیا ہم پر یہ فرض عائد نہیں کہ ہم بے سہارا لوگوں کی مدد کریں؟ کیا ہمیں یہ نہیں سوچنا چاہیے کہ کسی بھی وقت ہمیں موت آسکتی ہے؟ اور مرنے کے بعد ہمارا کیا ہوگا؟

دوسری جانب اداکارہ نے بتایا کہ وہ کافی عرصے سے ان تمام تر سوالات کے جوابات تلاش کرنے کی کوشش کر رہیں ہیں۔

ثناء خان نے بتایا کہ جب ان تمام تر سوالات کے جوابات انہوں نے اسلام کی روشنی میں ڈھونڈے تو اُنہیں جواب ملا کہ ہماری دُنیاوی زندگی کا مقصد آخرت کو بہتر بنانا ہے۔

انہوں نے کہا کہ اور یہ صرف اُس وقت ہی وقت ممکن ہے کہ جب ہم اللّہ تعالیٰ کے احکامات کے مطابق زندگی گُزاریں گے۔

بالی ووڈ کی سابق اداکارہ نے مزید کہا کہ ہماری زندگی کا مقصد دولت اور شہرت نہیں بلکہ گناہوں سے بچتے ہوئے انسانیت کی خدمت کرنا ہے۔

واضح رہے ثناءخان نے ایک اہم اعلان کرتے ہوئے لکھا کہ وہ شوبز انڈسٹری چھوڑ کر اپنی تمام زندگی انسانیت کے خدمت پر وقف کریں گی اور وہ اللّہ تعالیٰ کے حکم پر چلنے کا پکّا ارادہ کر رہی ہیں۔

ثناءخان نے اپنے تمام چاہنے والوں سے دُعا کی اپیل کرتے ہوئے کہا کہ سب اُن کے لیے دُعا کریں کہ وہ اپنے اس فیصلے پر ہمیشہ قائم رہیں۔

بھاررت کی سابق اداکارہ نے اپنی شئیر کی جانے والی پوسٹ کے اختتام میں کہا کہ اب کوئی بھی اُنہیں شوبز کے کسی کام کے لیے مدعو نہ کرے۔

واضح رہے کہ ثناء خان نے بتایا کہ یہ اُن کی زندگی کا سب سے خوشگوار لمحہ ہے۔