معاون خصوصی برائے سیاسی ابلاغ ڈاکٹر شہباز گِل نے کہا ہے کہ حکومت سندھ جزیروں کے معاملے کو سیاسی بنارہی ہے۔

تفصیلات کے مطابق معاون خصوصی برائے سیاسی ابلاغ  ڈاکٹر شہباز گِل نے بلاول زرداری کے بیان پر ردعمل دیتے ہوئے کہا کہ بلاول اپنے والد کے سکھائے گئے اصولوں کے عین مطابق لسانیت کی سیاست کر رہے ہیں۔

معاون خصوصی برائے سیاسی ابلاغ نے کہا کہ پیپلزپارٹی کا المیہ ہے کہ نہ کبھی خود عوامی فلاح کیے نہ کرنے دے رہے ہیں، انکی نظر صرف مال بنانے پر ہے جبکہ عمران خان عوامی ترقی کے علمبردار ہیں۔

ڈاکٹر شہباز گِل نے یہ بھی کہا کہ وفاقی حکومت جزائر کے معاملے  پر کوئی غیر آئینی اقدام نہیں کررہی، حکومت سندھ جزیروں کے معاملے کو سیاسی بنارہی ہے۔

معاون خصوصی برائے سیاسی ابلاغ کا کہنا تھا کہ آئی لینڈز کے معاملے پر وفاق پر ہرزہ سرائی کے بجائے ساتھ دیں، ہم جزائر کے معاملے پر سندھ عوام کے لیے روزگار کا سوچ رہے ہیں۔

ڈاکٹر شہباز گِل کا یہ بھی کہنا تھا کہ کراچی روشنیوں کا شہر جسے پیپلزپارٹی نے بڑی محنت سے اندھیروں میں دھکیلا، گزشتہ 12 سال میں پیپلزپارٹی نے سوائے بربادی کےسندھ کیلئے کچھ نہیں کیا۔

معاون خصوصی برائے سیاسی ابلاغ ڈاکٹر شہباز گِل کا مزید کہنا تھا کہ جعلی کارکردگی کا واویلا اور باتوں سے نکل کر عوام کیلئے سوچیں جبکہ بلاول کو منفی سیاست کے بجائے سندھ کے عوام کا معیار ِزندگی بلند کرنے پر کام کرنا چاہیے۔