وزیرخارجہ مخدوم شاہ محمود قریشی نے کہا ہے کہ سیاست میں دو نکتہ نظر ہوتے ہیں اور ہونے بھی چائیے لیکن مخالفت میں اتنے نہ بڑھ جائیں کہ پورا نظام متاثر ہو۔

تفصیلات کے مطابق وزیرخارجہ مخدوم شاہ محمود قریشی نے پارلیمنٹ ہاؤس کے باہر میڈیا سے گفتگو کرتے ہوئے کہا کہ احتجاج، جلسے جلوس آپ کا حق ہے ضرور کیجیے لیکن اگر آپ پوری معیشت کو مفلوج بنائیں گے تو کیا اس سے نظام کمزور ہوگا۔

شاہ محمود قریشی نے کہا کہ آج پوری دنیا سے اشارے مل رہے ہیں کہ کورونا وبا ایک مرتبہ پھر سر اٹھا رہی ہے، پاکستان ميں بھی وائرس سے متاثرین کی تعداد میں اضافہ ہو رہا ہے ان حالات میں اگر آپ ایسی سرگرمیاں جاری رکھیں گے تو اس کا نقصان آپ کے اپنے کارکنان کو ہوگا اور عام شہری کو ہوگا اس لیے ایسی حکمت عملی بنائیں جو نقصان کا باعث نہ بنے۔

وزیرخارجہ نے یہ بھی کہا کہ ہم نے گوجرانوالہ کے جلسے کیلئے پوری چھٹی دی جو وہ کہنا چاہتے تھے انہوں نے کہا بلکہ کچھ زیادہ ہی کہہ دیا جبکہ ان کے بیانیہ کی وجہ سے ان کی اپنی صفوں میں اس وقت کھلبلی مچی ہوئی ہے۔

شاہ محمود قریشی کا کہنا تھا کہ ان کی پارٹی کے اکثر لوگ سمجھتے ہیں کہ آپ کے ریاست مخالفت بیانیہ سے مل کی خدمت نہیں ہو رہی لہذا محتاط رہے جبکہ آپ ان عناصر کا آلہ کار بن رہے ہیں جو پاکستان میں عدم استحکام چاہتے ہیں۔

وزیرخارجہ مخدوم شاہ محمود قریشی کا مزید کہنا تھا کہ میں آپ کی نیت پر شک نہیں کر رہا لیکن ان قوتوں کا آلہ کار نہ بنیں جو افغانستان میں قیام امن کی کاوشوں اور کشمیر کے حوالے سے ہمارے بیانیے کے راستے میں روڑے اٹکانا چاہتے ہیں۔