وزیراعلیٰ پنجاب سردار عثمان بزدار نے کہا ہے کہ دکھ کی گھڑی میں ترک بہن بھائیوں کے ساتھ کھڑے ہیں۔

تفصیلات کے مطابق وزیراعلیٰ پنجاب سردار عثمان بزدار نے ترکی کے شہر ازمیرمیں زلزلے سے جانی و مالی نقصان  پر گہرے دکھ اور افسوس کا اظہار کیا ہے۔

وزیراعلیٰ پنجاب نے جاں بحق افراد کے لواحقین سے دلی ہمدردی اور اظہار تعزیت کی اور زخمیوں کی جلد صحت یابی کیلئے دعا بھی کی۔

سردار عثمان بزدار نے کہا کہ سوگوار خاندانوں کے غم میں برابر کے شریک ہیں اور دکھ کی گھڑی میں  ترک بہن بھائیوں کے ساتھ کھڑے ہیں۔

وزیراعلیٰ پنجاب سردار عثمان بزدار نے مزید کہا کہ ترک عوام سے مکمل یکجہتی کا اظہار کرتے ہیں جبکہ تمام تر ہمدردیاں جاں بحق افراد کے لواحقین اور زخمیوں  کے ساتھ ہیں۔

یاد رہے کہ ترکی کے شہر ازمیر میں زلزلے کے شدید جھٹکے محسوس کئے گئے ہیں جس کی ریکٹر اسکیل پر زلزلے کی شدت 7ریکارڈ کی گئی ہے۔

شہر میں زلزلے سے بڑے پیمانے پر تباہی بھی ہوئی ہے جس کے نتیجے میں کئی عمارتیں بھی گر گئیں ہیں۔

ازمیر کے قریب ساحلی شہر میں سمندر کی سطح بلند ہوگئی ہے جس کے باعث پانی آبادی میں داخل ہوگیا ہے جبکہ زلزلے کے جھٹکے بلغاریہ، یونان، لیبیا، برطانیہ، مصر میں بھی محسوس کیے گئے ہیں۔