وفاقی وزیر برائے ہوابازی غلام سرور خان نے کہا ہے کہ پی ڈی ایم کے ایجنڈے سے اس حکومت کو کوئی خطرہ نہیں۔

تفصیلات کے مطابق وفاقی وزیر برائے ہوابازی غلام سرور خان نے ٹیکسلا میں گیس فراہمی منصوبے کی افتتاحی تقریب سے خطاب کرتے ہوئے کہا کہ مسلم لیگ کو بننے والوں نے اپنا سب کچھ پاکستان کے نام کردیا جبکہ بدقسمتی سے تین دفعہ وزیر اعظم  بننے والے نے اس ملک کو کیا دیا۔

غلام سرور خان نے کہا کہ اس ملک کو خوشحال کرنا ہمارا فرض ہے، نہ اس کا کوئی سرمایہ ہے اور نہ ہی یہ اپنی اولاد کے لئے سرمایہ اکٹھا کر رہا ہے۔

وفاقی وزیر برائے ہوابازی نے یہ بھی کہا کہ پاکستان پہلی اسلامی ایٹمی قوت ہے یہ پاکستان کااعزاز ہے، گیارہ چور اورگیارہ لٹیرے جنہوں نے اس ملک کی عوام کا خون چوسا آج اکٹھے ہو گئے۔

غلام سرور خان کا کہنا تھا کہ نوازشریف کو شرم کرنی چاہئے تھی، نوازشریف تین مرتبہ وزیراعظم بنے انہیں اس حدتک نہیں جانا چاہئے تھا۔

وفاقی وزیر برائے ہوابازی کا یہ بھی کہنا تھا کہ نوازشریف اس ملک کے دشمنوں کے ساتھ مل کرملک کے خلاف کام کررہا ہے، نوازشریف کیخلاف جو بھی قانونی کارروائی بنتی ہے وہ کی جائے گی۔

غلام سرور خان نے کہا کہ ایسے ملک دشمن کو واپس لانے کیلئے کوئی دقیقہ فرگزاشت نہیں کرنی چاہیے، نوازشریف ہنود ویہود کا ایجنٹ ہے جبکہ نوازشریف بیشمارموقعوں پر ملک دشمنی کامرتکب ہوچکا ہے۔

وفاقی وزیر برائے ہوابازی غلام سرور خان نے مزید کہا کہ فوج کو گالی دینے والا پاکستان کی نفی کرتا ہے، فوج اس ملک، دوقومی نظریے اور سرحدوں کی محافظ ہے۔