وزیراعلیٰ خیبر پختونخوا محمود خان نے کہا ہے کہ صوبے میں گیس کے کم پریشر کا سبب بننے والے مسائل کو فوری طور پر حل کیا جائے۔

تفصیلات کے مطابق وزیراعلیٰ خیبر پختونخوا محمود خان کی زیر صدارت صوبائی کابینہ کا اجلاس ہوا جس میں کابینہ اراکین، چیف سیکرٹری ، ایڈیشنل چیف سیکرٹری اور صوبائی محکموں کے انتظامی سیکرٹریوں نے شرکت کی۔

    اجلاس میں صوبے میں بلدیاتی اور ضمنی انتخابات کے علاوہ نجی ہاﺅسنگ سکیم سے متعلق محکمہ بلدیات کے متعلقہ قانون میں ترامیم سے متعلق اُمور کا جائزہ لینے اور کابینہ کو حتمی سفارت پیش کرنے کیلئے کابینہ کی ایک کمیٹی تشکیل دی۔

کابینہ کمیٹی  10 دنوں کے اندر سفارشات کو حتمی شکل دے کر کابینہ کے اگلے اجلاس میں پیش کرے گی جبکہ مزکورہ کمیٹی میں وزیر بلدیات ، وزیر قانون، وزیر صحت، وزیرتعلیم کے علاوہ ایڈوکیٹ جنرل شامل ہونگے۔

کابینہ نے محکمہ بلدیات کے تحت قائم ڈی لیمٹیشن اتھارٹی کو کورآرڈنیشن یونٹ میں تبدیل کرنے کی منظوری دے دی جبکہ بلدیاتی انتخابات کیلئے صوبے کے سات ڈویژنل ہیڈکوارٹرز میں سٹی لوکل گورنمنٹ کے قیام کی بھی منظوری دے دی۔

کابینہ نے سرکاری ہسپتالوں میں دوران ڈیوٹی طبی عملے اور املاک کے تحفظ کو یقینی بنانے کیلئے قانون کے مسودے کی بھی منظوری دے دی اور اس قانون کی منظوری سے مریضوں کے تیمارداروں کی طرف سے طبی عملے پر تشدد اور املاک کو نقصان پہنچانے کے عمل کا تدارک کیا جا سکے گا۔

صوبے کے دور افتادہ علاقوں میں منتخب کردہ سرکاری ہسپتالوں میں طبی خدمات کی فراہمی کو بہتر بنانے کیلئے ان ہسپتالوں کی آﺅٹ سورسنگ کی اُصولی طور پر منظوری جبکہ گجو خان میڈیکل کالج کو ایم ٹی آئی کا درجہ دینے کی بھی منظوری دی گئی۔

کابینہ نے ایمبولینس سروس کے نظام کو بہتر بنانے کیلئے محکمہ صحت کے ایمبولینس کی بمعہ عملہ سمیت ریسکیو1122 کو حوالے کرنے کی باقاعدہ منظوری دے دی جبکہ صوبے کے نجی میڈیکل کالجوں میں داخلوں کیلئے 90 فیصد کوٹہ خیبرپختونخو اکے سکونتی اُمیدواروں کیلئے مختص جبکہ 10 فیصد دیگر صوبوں کے اُمیدواروں کیلئے مختص رکھنے کی بھی منظوری دی۔

پشاور یونیورسٹی کیلئے پروفیسر ڈاکٹر محمد ادریس، کوہاٹ یونیورسٹی آف سائنس اینڈ ٹیکنالوجی کیلئے پروفیسر ڈاکٹر سردار خان، یونیورسٹی آف سائنس اینڈ ٹیکنالوجی بنوں کیلئے ڈاکٹر خیر الزمان، باچا خان یونیورسٹی چارسدہ کیلئے ڈاکٹر بشیر احمد کا نام منظور

یونیورسٹی آف صوابی کیلئے ڈاکٹر شاہد محمود بیگ، عبدالولی خان یونیورسٹی کیلئے ڈاکٹر ظہور الحق، شہدائے اے پی ایس یونیورسٹی آف ٹیکنالوجی نوشہرہ کیلئے ڈاکٹر ظفر ایم خان اور یونیورسٹی آف انجینئرنگ اینڈ ٹیکنالوجی کیلئے ڈاکٹر افتخار حسین کے ناموں کی منظوری دی گئی۔

کابینہ نے اجلاس میں واٹر سپلائی اینڈ سنٹیشن کمپنی کوہاٹ اور سوات کے بورڈ آف ڈائریکٹر ز کے نئے ممبران کی تعیناتی کی بھی منظوری دے دی جبکہ رائٹ ٹو سروسز کمیشن کے چیف کمشنر کی خالی آسامی پر تعیناتی کیلئے سابق چیف سیکرٹری محمد سلیم خان کے نام کی بھی منظوری دی گئی۔

اجلاس میں وزیراعلیٰ خیبر پختونخوا محمود خان نے ہدایت دی کہ تمام صوبائی محکمے گزشتہ کابینہ اجلاس میں جاری سالانہ ترقیاتی پروگرام سے متعلق احکامات پر دیئے گئے ٹائم لائنز کے مطابق عمل درآمد کو یقینی بنائیں۔

محمود خان نے کہا کہ صوبے میں گیس کا کم پریشر ایک سنجیدہ عوامی مسئلہ ہے معاملہ وفاقی سطح پر متعلقہ حکام کے ساتھ اُٹھایا گیا ہے۔

اجلاس کی صدارت کرتے ہوئے وزیراعلیٰ خیبر پختونخوا نے مزید کہا کہ تمام محکمے سالانہ ترقیاتی پروگرام میں شامل منصوبوں کے پی سی ونز کی مقررہ مدت کے اندر متعلقہ فورم سے منظوری کو یقینی بنائیں۔