وزیراعلیٰ پنجاب سردار عثمان بزدار نے کہا ہے کہ بدقسمتی یہ ہے کہ اپوزیشن رہنماؤں کا بیانیہ پاکستان کے ازلی دشمن کو فائدہ پہنچا رہا ہے۔

تفصیلات کے مطابق وزیراعلیٰ پنجاب سردار عثمان بزدار نے اپنے ایک بیان میں اپوزیشن رہنماؤں پر تنقید کرتے ہوئے کہا کہ تین دہائیوں سے برسرار اقتدار رہنے والی جماعت کے لیڈروں کی پست ذہنیت بے نقاب ہو چکی ہے۔

وزیراعلیٰ پنجاب نے کہا کہ سیاست عوام کی خدمت کانام ہے لیکن اپوزیشن جماعتوں نے اقتدار کیلئے پاکستان کے مفادات کو زک پہنچائی۔

عثمان بزدار نے یہ بھی کہا کہ عوام راہبروں کے بھیس میں راہزنوں کے چہرے پہچان چکے ہیں جبکہ اداروں کے خلاف باتیں کرنے والوں کا کوئی مستقبل نہیں۔

وزیراعلیٰ پنجاب کا کہنا تھا کہ اپوزیشن کے ناعاقبت اندیش رہنما بیان بازی کرکے مکار مودی اور اس کے چیلوں کو خوش کر رہے ہیں۔

عثمان بزدار کا یہ بھی کہنا تھا کہ اپوزیشن جماعتوں نے ثابت کیا ہے کہ وہ صرف ذاتی مفادات کا تحفظ چاہتی ہیں جبکہ اپوزیشن رہنماؤں کا بیانیہ پاکستان کے ازلی دشمن کو فائدہ پہنچا رہا ہے۔

وزیراعلیٰ پنجاب سردار عثمان بزدار کا مزید کہنا تھا کہ اداروں کو متنازعہ بنانے کی ہر کوشش کی مذمت کرتے ہیں اور ہم اپنے اداروں کے ساتھ کھڑے ہیں اور کھڑے رہیں گے۔