کورونا وائرس کے پیش نظر وفاقی دارالحکومت میں مزید آئیسولیشن سنٹرز قائم کرنے کا فیصلہ کیا گیا ہے۔

تفصیلات کے مطابق وفاقی دارالحکومت میں مزید آئیسولیشن سنٹرز قائم کرنے کا فیصلہ کرتے ہوئے وزارت قومی صحت نے وزیراعظم عمران خان کے نام مراسلہ جاری کردیا۔

ذرائع کے مطابق وزارت قومی صحت نے مراسلے میں ساڑھے 59 کروڑ کے اضافی فنڈز مانگ لئے ہیں۔

وزارت قومی صحت کی جانب سے جاری مراسلے کے مطابق آئیسولیشن سنٹرز میں مریضوں کیلئے 150 اضافی بیڈز میسر آئیں گے جبکہ نئے آئیسولیشن سنٹرز کیلئے اضافی فنڈز فراہم کئے جائیں۔

مراسلے میں کہا گیا ہے کہ کورونا کے پیش نظر آئیسولیشن اسپتال کی استعدادکار بڑھانی ہے، آئیسولیشن اسپتال کی استعدادکار  50 سے 100 بیڈز کرنی ہے۔

مراسلے میں یہ بھی کہا گیا ہے کہ آئیسولیشن اسپتال کیلئے 54 کروڑ روپے فنڈز درکار ہیں جبکہ فیڈرل جنرل اسپتال کیلئے 53 ملین روپے کے فنڈز درکار ہیں اور فیڈرل جنرل اسپتال میں 100 بیڈز کا آئیسولیشن سنٹر قائم ہوگا۔

وزارت قومی صحت کی جانب سے جاری مراسلے میں مزید کہا گیا ہے کہ ایف جی ایچ میں طبی سہولیات بہتر بنانے کی ضرورت ہے جبکہ ایف جی ایچ  کیلئےطبی آلات این ڈی ایم اے فراہم کرے گی۔