پاکستان نے بھارتی وزیر دفاع کے گلگت بلتستان کے بارے میں بیان کو مسترد کر دیا۔

تفصیلات کے مطابق ترجمان دفتر خارجہ زاہد حفیظ چوہدری نے اپنے ایک بیان میں کہا کہ بھارتی وزیر دفاع کے گلگت بلتستان کے حوالے سے غیر ضروری بیان کو مسترد کرتے ہیں۔

اپنے بیان میں ترجمان دفترخارجہ نے کہا کہ بھارت کے پاس اس معاملے پر بیان دینے کے لیے تاریخی، قانونی یا اخلاقی کوئی جواز نہیں ہے۔

زاہد حفیظ چوہدری نے یہ بھی کہا کہ آر ایس ایس اور بی جے پی کے پوائنٹ سکورنگ کے لیے ایک کے بعد ایک بیان اور جھوٹے دعوے حقائق تبدیل نہیں کرسکتے۔

ترجمان دفترخارجہ کا کہنا تھا کہ بھارتی لیڈروں یہ غیر ضروری بیان کشمیری عوام کے خلاف ہونے والی انسنانی حقوق کی قابل مزمت پامالیوں سے توجہ مبذول نہیں کروا سکتے۔

زاہد حفیظ چوہدری کا یہ بھی کہنا تھا کہ پاکستان کشمیر کے حوالے سے اپنے موقف پر اقوام متحدہ کی قراردوں کے مطابق قائم ہے، مسئلہ کشمیر کا واحد حل اقوام متحدہ کے زیر اہتمام آزاد،غیر جانبدارانہ رائے شماری اور کشمیریوں کے حق خود ارادیت کے حق کے استعمال میں ہے۔

ترجمان دفترخارجہ زاہد حفیظ چوہدری کا مزید کہنا تھا کہ انتظامی ، سیاسی، اور معاشی اصلاحات گلگت بلتستان کے عوام کا دیرینہ مطالبہ ہے، بھارت مقبوضہ کشمیر پر غیر قانونی اور زبردستی قبضے کو فی الفور ختم کرے۔