صوبائی وزیر صنعت وتجارت میاں اسلم اقبال نے کہا ہے کہ فنی تعلیم کا فروغ پنجاب حکومت کی اولین ترجیحات میں شامل ہے۔

تفصیلات کے مطابق صوبائی وزیر صنعت وتجارت میاں اسلم اقبال کی زیر صدارت ٹیوٹا سیکٹر کے سربراہان کا سول سیکرٹریٹ میں اجلاس ہوا جس میں پنجاب سکلز ڈویلپمنٹ اتھارٹی کے امور،ہنر مند افرادی قوت کی تیاری اور معیاری فنی تعلیم کے فروغ  کے اقدامات جائزہ لیا گیا۔

اجلاس میں پنجاب سکلز ڈویلپمنٹ اتھارٹی کے بورڈ میں ٹیوٹا،پی وی ٹی سی اور پنجاب سکلز ڈویلپمنٹ فنڈ کے سربراہوں کو شامل کرنے پر اتفاق بھی کیا گیا۔

میاں اسلم اقبال نے کہا کہ فنی تعلیم کے اداروں کو پنجاب سکلز ڈویلپمنٹ اتھارٹی کے تحت ایک چھتری تلے لایا گیا ہےجبکہ غربت اور بے روزگاری کے مسائل پر قابو پانے کے لئے فنی تعلیم کا فروغ وقت کی ضرورت ہے۔

صوبائی وزیر صنعت وتجارت نے یہ بھی کہا کہ مارکیٹ کی ضروریات کے مطابق ہنر مند افرادی قوت کی تیاری پر خصوصی توجہ دی گئی ہے جبکہ ہنر مند نوجوان پروگرام کے تحت نوجوانوں کو فنی تعلیم کے اداروں میں جدید علوم سے آراستہ کیا جارہا ہے۔

میاں اسلم اقبال کا کہنا تھا کہ فنی تعلیم کے اداروں سربراہان حکومتی ترجیحات کی روشنی میں فنی تعلیم کو فروغ دیں جبکہ فنی تعلیم کے فروغ کے اہداف طے کر کے آگے بڑھا جائے۔

صوبائی وزیر صنعت وتجارت میاں اسلم اقبال کا مزید کہنا تھا کہ ٹیکنیکل ایجوکیشن کے فروغ کے اہداف حاصل کرکے ہی صنعت کی ضرورت کے مطابق تربیت یافتہ افرادی قوت دستیابی کو یقینی بنایا جا سکتا ہے۔

چیف اپرینٹنگ آفیسرٹیوٹا اختر عباس بھروانا،سی ای او پی ایس ڈی ایف جواد خان،چیئرمین پی وی ٹی سی میجر ریٹائرڈ شاہنواز،ایڈیشنل پروجیکٹ ڈائریکٹر ہارون نصیر اور متعلقہ افسران نے شرکت کی۔