وزیراعلیٰ پنجاب سردار عثمان بزدار نے کہا ہے کہ عوام کے حقوق کا نگہبان ہوں،کسی کو عوام کے مفادات پر ڈاکہ نہیں ڈالنے دوں گا۔

تفصیلات کے مطابق وزیراعلیٰ پنجاب سردار عثمان بزدار سے معاون خصوصی اطلاعات ڈاکٹر فردوس عاشق اعوان کی ملاقات ہوئی جس میں قومی اداروں کے خلاف مذموم عزائم کی تکمیل کے لئے چلائی جانے والی مہم کی شدید مذمت کی گئی۔

وزیراعلی پنجاب سردار عثمان بزدار نے وزیراعظم عمران خان کے پاکستان دوست بیانیے کو بھرپور طریقے سے اجاگر کرنے کی ہدایت کرتے ہوئے کہا کہ صوبے میں جاری فلاحی منصوبوں کو موثر انداز سے عوام کے سامنے لایا جائے۔

وزیراعلی پنجاب نے کہا کہ 2 برس کے دوران وہ کام کئے جو سابقہ حکومتیں نہ کرسکیں جبکہ ہمارا مقصد عوام کو ریلیف دینا اوران کیلئے آسانیاں پیدا کرنا ہے۔

سردار عثمان بزدار نے یہ بھی کہا کہ اپوزیشن جماعتوں کا پاکستان مخالف بیانیہ پٹ چکا ہے لیکن میں کسی کو عوام کے مفادات پر ڈاکہ نہیں ڈالنے دوں گا

وزیراعلی پنجاب سردار عثمان بزدار نے مزید کہا کہ اداروں کو متنازع بنانے کی کوشش پاکستان کو کمزور کرنے کی سازش ہے، ہر سطح پر اپنے اداروں کا دفاع کریں گے۔

اس موقع پر معاون خصوصی اطلاعات ڈاکٹر فردوس عاشق اعوان نے کہا کہ سیاسی یتیم پاکستان کے اداروں کے خلاف منظم مہم چلا رہے ہیں ، حکومت کے عوامی فلاح کے کاموں کو بہترین طریقے سے اجاگر کیا جائے گا-

معاون خصوصی اطلاعات ڈاکٹر فردوس عاشق اعوان نے مزید کہا کہ اپوزیشن جماعتیں ہر محاذ پر ناکام ہو چکی ہیں جبکہ قومی اداروں کے خلاف پراپیگنڈا ملک دشمن عناصر کا ایجنڈا ہے۔