وزیراطلاعات سندھ سید ناصر حسین شاہ نے کہا ہے کہ تجاوزات ہٹانے کا مقصد شہر کو ڈوبنے سے بچانا ہے۔

تفصیلات کے مطابق وزیراطلاعات سندھ سید ناصر حسین شاہ نے اپنے ایک بیان میں کہا کہ کوآرڈینیشن کمیٹی کے فیصلوں کے مطابق نالوں پر تجاوزات ہٹائے جارہے ہیں۔

سید ناصر حسین شاہ نے کہا کہ تجاوزات ہٹانے کا مقصد نالوں کی مکمل صفائی اور شہر کو ڈوبنے سے بچانا ہے جبکہ پہلے مرحلے میں محمود آباد نالے کے اطراف سے تجاوزات ہٹائے جائیں گے۔

اپنے بیان میں وزیراطلاعات سندھ سید ناصر حسین شاہ نے مزید کہا کہ تجاوزات سے ہٹائے گئے متاثرین کو حکومت دوسری جگہ الاٹ  کرے گی۔

یاد رہے بلدیہ عظمی کراچی کے محکمہ انسداد تجاوزات نے شہر میں تجاوزات کے خلاف ڈنڈا اٹھا لیا، تجاوزات کے خلاف شہر کے مختلف علاقوں میں کارروائیاں کی جارہی ہیں۔

اس ضمن میں بلدیہ عظمی کراچی کے سینئیر ڈائریکٹر برائے انسداد تجاوزات بشیر صدیقی کہتے ہیں کہ ایڈمنسٹریٹر کراچی افتخار شالوانی چاہتے ہیں کہ شہر کی سڑکوں سے تجاوزات کا خاتمہ کر کے شہر کی خوبصورتی میں اضافہ کیا جائے۔

نارتھ کراچی ناگن چورنگی سے پاور ہائوس چورنگی، نشتر روڈ اور تین ہٹی پل کے نیچے آپریشن کئے گئے جبکہ بڑے پیمانے پر تجاوزات بھی ضبط کرلی گئیں اور ہیوی مشینری کے ذریعے کچی پکی تجاوزات کو مسمار کردیا گیا۔