اسپیکر قومی اسمبلی اسد قیصر کی زیرِ صدارت پاک افغان فرینڈ شپ گروپ کی ایگزیکٹو کمیٹی کا اجلاس ہوا۔

مشیر تجارت عبدالرزاق داؤد نے دورہ افغانستان کے دوران افغان حکومت اور تاجر برادری سے ہونے والی ملاقات کے نتیجے میں پیش رفت سے متعلق کمیٹی کو بریفنگ دیتے ہوئے کہا کہ پاکستان میں گزشتہ ماہ ہونے والے پاک-افغان تجارت و سرمایہ کاری سیمینار دونوں ممالک کے مابین تجارت و سرمایہ کاری کو وسعت دینے میں اہم سنگ میل ثابت ہوئی ہے۔

اجلاس کی صدارت کرتے ہوئے اسپیکر قومی اسمبلی اسد قیصر نے کہا کہ افغان بارڈر پر درپیش مسائل کو حل کرنے کے لیے پاک افغان فرینڈشپ گروپ اور ٹاسک فورس کی کاوشوں کے نتیجے میں پاک-افغان تجارت و سرمایہ کاری میں اضافہ ہوا ہے۔

اسد قیصر نے یہ بھی کہا کہ پاکستان کی تاریخ میں پہلی بار افغانستان کے 23 اراکین پارلیمنٹ پر مشتمل وفد نے تجارت اور سرمایہ کاری کے سلسلے میں پاکستان کا دورہ کیا ہے۔

اسپیکر قومی اسمبلی اسد قیصر نے مزید کہا کہ افغان ترجیحی تجارتی معاہدے پر مزاکرات کو جلد مکمل کیا جائے، افغان فرینڈشپ گروپس اور ٹاسک فورس کی ایکزیکٹیو کمیٹی کی سفارشات پر عملدرآمد کے لیے اپنا کردار ادا کرے گی۔

اجلاس میں ممبران قومی اسمبلی یعقوب شیخ، شندانہ گلزار، وزیراعظم کے مشیر تجارت عبدالرزاق داؤد، کسٹم حکام صوبائی چیف سیکرٹری بلوچستان نے شرکت کی جبکہ ویڈیو لنک کے ذریعے ارباب شہزاد اور وزیر اعظم کے خصوصی ایلچی برائے افغانستان صادق خان شریک ہوئے۔