پاکستان پیپلزپارٹی کی مرکزی سیکریٹری اطلاعات و رکن قومی اسمبلی ڈاکٹر نفیسہ شاہ نے کہا ہے کہ گلگت بلتستان میں الیکشن سے قبل وفاقی حکومت کی سرگرمیاں انتخابی ضابطہ اخلاق کی کھلی خلاف ورزی ہیں۔

تفصیلات کے مطابق پاکستان پیپلزپارٹی کی مرکزی سیکریٹری اطلاعات نفیسہ شاہ نے کراچی میں بلاول ہائوس میں پریس کانفرنس کرتے ہوئے کہا کہ گلگت بلتستان کے انتخابات کوہائی جیک کرنے کے لیے وزیراعظم سمیت وفاقی وزرا کی سرگرمیاں انتخابی ضابطہ اخلاق کی کھلی خلاف ورزی ہے۔

رکن قومی اسمبلی ڈاکٹر نفیسہ شاہ نے کہا کہ وفاقی حکومت گلگت میں دھاندلی کی منصوبہ بندی کرچکی ہے، حکومت کی طرف سے گلگت بلتستان انتخابات سے قبل دھاندلی پر پیپلزپارٹی الیکشن کمیشن سے نوٹس لینے کا مطالبہ کرتی ہے۔

پاکستان پیپلزپارٹی کی مرکزی سیکریٹری اطلاعات نے یہ بھی کہا کہ گلگت بلتستان الیکشن میں دھاندلی کی گئی تو اسلام آباد کی طرف مارچ کریں گے۔

رکن قومی اسمبلی ڈاکٹر نفیسہ شاہ کا کہنا تھا کہ نیب اپوزیشن کودباؤ میں لانے کے لیے استعمال کیا جارہا ہے جبکہحکومت دھمکیوں پراترآئی ہے اوراپوزیشن کودیوارسے لگانے کے لیے غداری کے الزامات لگائے جارہے ہیں۔

ڈاکٹر نفیسہ شاہ کا یہ بھی کہنا تھا کہ کہ ملک گرے لیسٹ میں ہے اور وفاق اس کو سیلیبریٹ کر رہا ہے جبکہ یہ بھی کہا جا رہا ہے کہ بلیک لیسٹ میں گیا تو اپوزیشن ذمہ دار ہوگی۔

پاکستان پیپلزپارٹی کی مرکزی سیکریٹری اطلاعات و رکن قومی اسمبلی ڈاکٹر نفیسہ شاہ کا مزید کہنا تھا کہ حکمرانوں نے چھ ماہ سے پارلیمنٹ کو یرغمال بنا کرآرڈیننس پاس کرائے ہیں،ملکی مفاد میں اپوزیشن نے کئی قوانین کی منظوری میں ساتھ دیا مگریہ بتائیں اس سب کے باوجود آپ آج ڈھائی برس بعد بھی ادھر ہی کھڑے ہیں۔