چیئرمین نیب جسٹس رجاوید اقبال نے کہا ہے کہ میگا کرپشن کے مقدمات کو منطقی انجام تک پہنچانا نیب کی اولین ترجیح ہے۔

تفصیلات کے مطابق چیئرمین نیب جسٹس رجاوید اقبال کی زیر صدارت اجلاس ہوا جس میں میگا کرپشن کیسز میں پیش رفت کا تفصیلی جائزہ لیا گیا۔

ترجمان نیب نے کہا کہ اجلاس میں نیب آگاہی مہم کی ورلڈ اکنامک فورم نے پذیرائی کی جبکہ کرپشن کے برے اثرات پر نیب کی آگاہی مہم کی ٹرانسپیرنسی انٹرنیشنل نے بھی پذیرائی کی۔

اجلاس کی صدارت کرتے ہوئے چیئرمین نیب جسٹس رجاوید اقبال نے کہا کہ نیب سیکشن 33 سی کے تحت کرپشن کیخلاف لوگوں کو آگاہ کررہا ہے جبکہ میگا کرپشن کے مقدمات کو منطقی انجام تک پہنچانا نیب کی اولین ترجیح ہے۔

میٹنگ میں ڈیپٹی چیئرمین نیب، ڈی جی نیب آپریشن و دیگر حکام شریک ہوئے۔

واضح رہے اس سے قبل چیئرمین نیب جسٹس ر جاوید اقبال کی زیر صدارت اجلاس ہوا جس میں بریفنگ کے دوران کہا گیا تھا کہ نیب راولپنڈی جعلی اکاونٹس سیکنڈل کے اب تک 10ریفرنسز دائر کر چکی ہے جبکہ جعلی اکاونٹس کے 12کیسز انوسٹی گیشن ، 21کیسز انکوائری کے مراحل میں ہے۔

بریفنگ میں یہ بھی کہا گیا تھا کہ نیب راولپنڈی جعلی اکاونٹس سکینڈل میں کل 43 کیسز میں اب تک دس ریفرنسز احتساب عدالتوں میں دائر چکا ہے جبکہ پلی بارگین اور اراضی کی مد میں نیب راولپنڈی اب تک 23ارب وصول کر چکی ہے۔