وزیراعلیٰ پنجاب سردار عثمان بزدار نے فیصل آباد کی ترقی و خوشحالی کے لئے 13ارب روپے کے پیکیج کا اعلان کردیا۔

تفصیلات کے مطابق وزیراعلیٰ پنجاب سردار عثمان بزدار نے فیصل آباد میں برآمد کنندگان اور تاجر برادری سے خطاب کرتے ہوئے کہا کہ فیصل آباد ترقی کرے گا تو پاکستان ترقی کرے گا۔

وزیراعلیٰ پنجاب نے کہا کہ ترقیاتی پیکیج کے تحت فیصل آباد میں سڑکیں، پارکس، سیوریج اور پینے کے صاف پانی کے منصوبے شروع کئے جائیں گے جبکہ اس پیکیج کے تحت صحت او رتعلیم کی سہولتوں کو بہتر بنائیں گے اور یہ پیکیج سالانہ ترقیاتی پروگرام کاحصہ ہوگا۔

سردار عثمان بزدار نے یہ بھی کہا کہ فیصل آباد پاکستان کا مانچسٹر ہے، فیصل آباد ترقیاتی پیکیج پر تیزی سے عملدرآمد کر کے دکھائیں گے۔

وزیراعلیٰ پنجاب کا کہنا تھا کہ وزیراعظم عمران خان کو فیصل آباد آمد پر خوش آمدید کہتے ہیں، تمام علاقوں کی یکساں ترقی تحریک انصاف کا منشور ہے۔

سردار عثمان بزدار کا یہ بھی کہنا تھا کہ پنجاب میں کاروبار کا پہیہ تیزی سے چل رہا ہے، ہماری حکومت نے کاروبار میں آسانیاں پیدا کی ہیں اور پنجاب نے اس ضمن میں لیڈ لی ہے۔

وزیراعلیٰ پنجاب نے کہا کہ ہماری حکومت نے 5سیمنٹ فیکٹریوں کو این او سی جاری کردئیے ہیں، دسمبر تک مزید 16فیکٹریوں کو این او سی جاری کردئیے جائیں گے۔

سردار عثمان بزدار نے یہ بھی کہا کہ پنجاب حکومت صوبے میں 13سپیشل اکنامک زونز کے قیام کی منظوری دے چکی ہے جبکہ وفاقی حکومت نے 7 سپیشل اکنامک زونز کے قیام کے نوٹیفکیشن جاری کردئیے ہیں۔

وزیراعلیٰ پنجاب کا کہنا تھا کہ وزیراعظم عمران خان نے آج کشمیر انڈر پاس کے منصوبے اور ماڈل پولیس سٹیشن کا افتتاح کیا ہے، پنجاب بھر میں نئے ماڈل تھانے بنا رہے ہیں۔

عثمان بزدار کا یہ بھی کہنا تھا کہ فیصل آباد میں پہلے بھی آیا اور آج وزیراعظم عمران خان کے ہمراہ پھر آیا ہوں جبکہ ترقیاتی پیکیج فیصل آباد کے شہریوں کا حق ہے جو ہم نے انہیں لوٹایا ہے۔

وزیراعلیٰ پنجاب سردار عثمان بزدار کا مزید کہنا تھا کہ عوام کے مسائل حل کریں گے، نیاپاکستان بن رہاہے او رسب کو نیا پاکستان نظر بھی آئے گا۔