وزیر خارجہ شاہ محمود قریشی نے کہا ہے کہ قومی اداروں کے ساتھ کھڑے ہیں اور کھڑے رہیں گے۔

تفصیلات کے مطابق وزیراعلیٰ پنجاب سردار عثمان بزدار سے وزیر خارجہ شاہ محمود قریشی کی ملاقات ہوئی کس میں باہمی دلچسپی کے امور، سیاسی صورتحال اور جنوبی پنجاب سیکرٹریٹ کے امور پر تبادلہ خیال کیا گیا۔

اس موقع پر عثمان بزدار اور شاہ محمود قریشی نے اداروں کو متنازعہ بنانے کی مذموم مہم کی شدید مذمت کی۔

ملاقات میں دونوں رہنماؤ ں نے عزم کیا کہ اداروں کے خلاف ہر سازش کا ڈٹ کر مقابلہ کیا جائے گا جبکہ قومی اداروں کے وقار پر کوئی حرف نہیں آنے دیں گے۔

سردار عثمان بزدار نے کہا کہ پاکستان کے ادارے سب کے لئے قابل احترام ہیں جبکہ مخصوص ایجنڈے کے تحت اداروں کو نشانہ بنانا انتہائی افسوسناک امر ہے۔

وزیراعلیٰ پنجاب نے یہ بھی کہا کہ افراتفری پھیلانے کی کوشش کرنے والے عناصر دشمن کے ایجنڈے پر چل رہے ہیں لیکن مایوسی کا شکار اپوزیشن عوام کو گمراہ نہیں کرسکتی۔

سردار عثمان بزدار کا کہنا تھا کہ جنوبی پنجاب سیکرٹریٹ میں مختلف محکموں کے سیکرٹریز عوام کو سروسز فراہم کررہے ہیں جبکہ جنوبی پنجاب سیکرٹریٹ کو انتظامی و مالیاتی لحاظ سے خود مختاری دی گئی ہے۔

وزیراعلیٰ پنجاب سردار عثمان بزدار کا مزید کہنا تھا کہ جنوبی پنجاب کی ترقی و خوشحالی کے لئے مختص فنڈز کسی اور مقصد کیلئے استعمال نہیں ہوں گے۔

اس موقع پر وزیر خارجہ شاہ محمود قریشی نے کہا کہ اداروں کے خلاف بیان بازی کرنے والے ملک و قوم کے خیرخواہ نہیں ، قومی اداروں کے ساتھ کھڑے ہیں اور کھڑے رہیں گے۔

شاہ محمود قریشی نے کہا کہ اپوزیشن اداروں کو متنازعہ بنا کر مذموم مقاصد حاصل کرنا چاہتی ہے جبکہ جنوبی پنجاب سیکرٹریٹ کا قیام تحریک انصاف کی حکومت کا بڑا اقدام ہے۔

وزیر خارجہ نے یہ بھی کہا کہ ماضی میں جنوبی پنجاب کے لوگوں کو کھوکھلے نعروں سے بہلایا گیا جبکہ سابق حکمرانوں نے جنوبی پنجاب کی ترقی کے نام پر لئے گئے فنڈ اپنے حلقوں پر لگائے۔

شاہ محمود قریشی کا کہنا تھا کہ تحریک انصاف کی حکومت جنوبی پنجاب کے عوام سے کئے گئے وعدے نبھا رہی ہے جبکہ جنوبی پنجاب سیکرٹریٹ کے قیام سے مقامی لوگوں کو ریلیف مل رہا ہے۔

وزیر خارجہ شاہ محمود قریشی کا مزید کہنا تھا کہ جنوبی پنجاب کے عوام نے ترقی کے نام پر دھوکہ دینے والوں کو عام انتخابات میں بری طرح مسترد کیا جبکہ تحریک انصاف کو جنوبی پنجاب میں شاندار مینڈیٹ ملا، عوام کے دئیے گئے مینڈیٹ کی لاج رکھیں گے۔

وزیراعلیٰ پنجاب سردار عثمان بزدار سے وزیر خارجہ شاہ محمود قریشی کی ہونے والی اس ملاقات میں رکن قومی اسمبلی زین قریشی بھی شریک ہوئے۔