وزیر کالونیز و جیل خانہ جات پنجاب فیاض الحسن چوہان نے کہا ہے کہ آصفہ بھٹو کا پی ڈی ایم ریلی کی قیادت کرنا تمام سینیئر پیپلز پارٹی قائدین اور میرٹ کے نام پر طمانچہ ہے۔

تفصیلات کے مطابق وزیر کالونیز و جیل خانہ جات پنجاب فیاض الحسن چوہان نے بیگم صفدراعوان کے بیانات ہر ردعمل دیتے ہوئے کہا کہ پی ڈی ایم کی کرپٹ چھتری تلے اکٹھی جماعتوں کا جمہوریت سے دور پار کا تعلق نہیں۔

اپنے بیان میں فیاض الحسن چوہان نے کہا کہ جمہوریت کا راگ الاپنے والی اپوزیشن جماعتیں خاندانی سیاست اور اقربا پروری سے باہر نہیں نکل سکیں۔

وزیر کالونیز و جیل خانہ جات پنجاب نے یہ بھی کہا کہ ن لیگ اور پیپلز پارٹی کے کارکنان اور قائدین نے اپنی ساری زندگی ان جماعتوں کے لیے وقف کردی لیکن قیادت بھٹو، زرداری اور شریف خاندان کے کل کے بچوں کے ہاتھ آئی جبکہ آصفہ بھٹو کا پی ڈی ایم ریلی کی قیادت کرنا تمام سینیئر پیپلز پارٹی قائدین اور میرٹ کے نام پر طمانچہ ہے۔

فیاض الحسن چوہان کا کہنا تھا کہ اپنی دادی کے انتقال کو بھی سیاسی شعبدہ بازی کے لیے استعمال کرنے والی بیگم صفدر اعوان سے کچھ بھی بعید نہیں۔

وزیر کالونیز و جیل خانہ جات پنجاب فیاض الحسن چوہان کا مزید کہنا تھا کہ گزشتہ ستر سال سے ملک کے اقتدار پر قابض رہنے والوں کو ایک موقع اور نہیں دیا جا سکتا، عوام جانتے ہیں کہ یہ ٹھگ دوبارہ حکمران بنے تو پاکستان کو تباہ و برباد کر دیں گے۔