وزیر جیل خانہ جات پنجاب فیاض الحسن چوہان نے کہا ہے کہ تمام قیدیوں بالخصوص عورتوں اور کم سن قیدیوں کی فلاح میرا اولین ایجنڈا ہے۔

تفصیلات کے مطابق وزیر جیل خانہ جات پنجاب فیاض الحسن چوہان کی کی آئی جی جیل خانہ جات مرزا شاہد سلیم بیگ سے ملاقات ہوئی ہے جس میں آئی جی جیل خانہ جات نے فیاض الحسن چوہان کو محکمانہ امور پر تفصیلی بریفنگ دی۔

اس موقع پر وزیر جی جیل خانہ جات فیاض الحسن چوہان نے قیدیوں کے لیے سہولیات، ملاقات کے طریقہ کار، کھانے اور دیگر سہولیات کا معائنہ کیا جبکہ صوبے بھر کی جیلوں میں بہتری لانے کے لئے مختلف اقدامات پر بھی گفتگو کی گئی۔

وزیر جیل خانہ جات پنجاب نے کہا کہ وزیراعظم عمران خان اور وزیر اعلٰی پنجاب کی جانب سے جیل ریفارمز کا اہم ٹاسک سونپا گیا ہے جبکہ یکساں سہولیات کی فراہمی اور وی آئی پی کلچر کا خاتمہ بھی میری اولین ترجیحات میں شامل ہے۔

فیاض الحسن چوہان نے یہ بھی کہا کہ وزیر اعلٰی پنجاب کی ہدایات پر سوشل سیکٹر کو بھی جیل ریفارمز ایجنڈے میں شامل کرنے پر غور کیا جا رہا ہے جبکہ تمام قیدیوں بالخصوص عورتوں اور کم سن قیدیوں کی فلاح میرا اولین ایجنڈا ہے

وزیر جیل خانہ جات پنجاب فیاض الحسن چوہان نے مزید کہا کہ جیل سے نکلنے والے ہر فرد کو عادی مجرم سے معاشرے کا ذمہ دار شہری بنانے پر ساری توجہ ہو گی۔