مسلم لیگ ن کی  نائب صدر مریم نواز نے کہا ہے کہ حکومت جاتی نظر آرہی ہے، چار سال تو بہت دور کی بات یہ حکومت چار مہینے نہیں نکال سکتی۔

تفصیلات کے مطابق مسلم لیگ ن کی  نائب صدر مریم نواز نے پریس کانفرنس کرتے ہوئے کہا کہ یہ حکومت نہیں ہے یہ ووٹ چوری کرکے آئی ہے ہمارے سر پر مسلط کیا گیا ہے۔

 مسلم لیگ ن کی  نائب صدر نے کہا کہ جب عوامی غصہ، عوامی قہر جاگ اٹھتا ہے تو اس قسم کے انتظامات کار گرثابت نہیں ہوتے اور اگر آپ کو پی ڈی ایم سے فرق نہیں پڑ رہا تو اچانک ایک مہینہ پہلے الیکشن کیوں اناؤنس کرنا پڑا۔

مریم نواز نے یہ بھی کہا کہ ان کو یہ سمجھ آ گئی ہے کہ حکومت کے پاس دن تھوڑے ہیں، نااہل ، ناکام حکومت جب عوامی گھیرے میں آجاتی ہے تو اسطرح کےہتھکنڈے پر اتر آتی ہے لیکن آپ جوبھی ہتھکنڈےاستعمال کریں آپ کو گھر جانا پڑے گا اور جلدی جانا پڑے گا۔

مسلم لیگ ن کی نائب صدر کا کہنا تھا کہ آپ نے قومی اداروں کو تباہ کیا ایف بی آر کے چیئرمین بھی خود ہی بن جاتے ہیں، الیکشن کے شیڈول کا اعلان الیکشن کمیشن آف پاکستان کو کرنا ہے، آپ نے کس حیثیت میں ایک مہینے پہلے سینیٹ الیکشن کا اعلان کیا۔

مریم نواز کا یہ بھی کہنا تھا کہ آپ سپریم کورٹ کو کس خوشی میں متنازع بنارہے ہیں جبکہ شو آف ہینڈز کے خلاف نہیں لیکن اس اعلان کے پیچھے شفافیت نہیں ہے آپ کمزور ہوگئے ہیں اس لئے آپ کو آج شو آف ہینڈز یاد آگیا۔

اپنے بیان میں مریم نواز نے کہا کہ اس کے لیے آئینی ترمیم کی ضرورت ہے آرڈیننس کے ذریعے بلڈوز نہیں کر سکتے، سپریم کورٹ صرف اس کی تشریح کرسکتی ہے، نیا قانون تو نہیں بناسکتی۔

مسلم لیگ ن کی  نائب صدر مریم نواز کا مزید کہنا تھا کہ اب حکومت سے نہ بات چیت ہونی چاہیے نہ ہوگی جبکہ ہم کیا قانونی اقدامات لیں گےاسکا پی ڈی ایم پلیٹ فارم سے فیصلہ کریں گے۔