وزیر خارجہ شاہ محمود قریشی نے کہا ہے کہ کل بہاولپور میں پی ڈی ایم کا شو تھا مگر اس میں پاور نہیں تھی اس لیے میں اسے “پاور شو” نہیں کہوں گا۔

تفصیلات کے مطابق وزیر خارجہ شاہ محمود قریشی نے پی ڈی ایم کے احتجاج، ملکی و علاقائی صورتحال کے حوالے سے اہم بیان میں کہا کہ تحریک انصاف کی حکومت نے گذشتہ ڈھائی سال کے مختصر عرصے میں جنوبی پنجاب کے حوالے سے دو بڑے فیصلے کئے۔

شاہ محمود قریشی نے کہا کہ اختیارات کی نچلی سطح پر منتقلی کیلئے ملتان اور بہاولپور میں دو انتظامی سیکریٹیریٹ قائم کیے گئے جبکہ جنوبی پنجاب کے لئے خصوصی فنڈز مختص کئے گئے جو جنوبی پنجاب کی تعمیر و ترقی پر خرچ ہونگے۔

 وزیر خارجہ کا کہنا تھا کہ اس وقت ہندوستان ہماری سرحدوں پر گولہ باری کر رہا ہے آئے روز لاین آف کنٹرول کی خلاف ورزیاں ہو رہی ہیں، اپوزیشن کو معلوم ہونا چاہیے کہ بھارت، پاکستان کے اندر دہشتگردی کی پشت پناہی کر رہا ہے بلوچستان میں یکے بعد دیگرے واقعات ہو رہے ہیں ان حالات میں جب آپ اداروں پر تنقید کرتے ہیں تو آپ بھارتی بیانیے کی ترویج کر رہے ہیں۔

 شاہ محمود قریشی کا یہ بھی کہنا تھا کہ اسٹیبلشمنٹ، ہمیشہ آئین اور قانون کے دائرے میں رہتے ہوئے ریاست کے مفادات کا تحفظ کرتی ہے جبکہ ہندوستان ہائبرڈ وارفیر کے ذریعے ایسے واقعات کروا رہا ہے تاکہ لوگوں میں بددلی پھیلے اور پاکستان میں ہونیوالی سرمایہ کاری متاثر ہو۔

وزیر خارجہ نے کہا کہ ہم نے ایک ڈوزئیر کے ذریعے بھارتی دہشت گردی کے حوالے سے اہم شواہد اور حقائق کو دنیا کے سامنے رکھ دیا ہے جبکہ ای یو انفولیب کے چشم کشا انکشافات دنیا کے سامنے آ چکے ہیں اور اس رپورٹ نے بھارت کے اصلی چہرے کو بے نقاب کر دیا ہے۔

شاہ محمود قریشی نے یہ بھی کہا کہ بھارت کی ہندوتوا پالیسیوں کی وجہ سے سیکولرازم کا تصور دفن ہو چکا ہے، آج بھارت میں امتیازی قوانین کے زریعے اقلیتوں کو دیوار سے لگایا جا رہا ہے جبکہ پورے بھارت میں کسان سراپا احتجاج ہیں۔

وزیر خارجہ کا کہنا تھا کہ آج بین الاقوامی میڈیا بھی کھل کر بھارت کے خلاف لکھ رہا ہے جبکہ مسئلہ کشمیر کو ہم ہر فورم پر اٹھا رہے ہیں اور اٹھاتے رہیں گے اور انشاءاللہ حق خود ارادیت کی تحریک کامیابی سے ضرور ہمکنار ہو گی۔

شاہ محمود قریشی کا یہ بھی کہنا تھا کہ ہم نے سیکرٹری جنرل اقوام متحدہ، اور جنیوا میں ہیومن رائٹس کمشنر کو خطوط ارسال کیے اور ان سے مطالبہ کیا کہ ان سب قائدین کو فری اور فیر ٹرائل کی سہولت مہیا کی جائے جبکہ تمام سیاسی قیدیوں کو فی الفور رہا کیا جائے۔

وزیر خارجہ شاہ محمود قریشی کا مزید کہنا تھا کہ مقبوضہ جموں و کشمیر میں جاری انسانی حقوق کی سنگین خلاف ورزیوں کے حوالے سے  ہیومن رائٹس کمشنر کی غیر جانبدارانہ سامنے آنے والی دو انکوائری رپورٹس پر عملدرآمد کو یقینی بنایا جائے جبکہ اقوام متحدہ کمیشن آف انکوائری کے ذریعے زمینی حقائق کے حوالے سے شفاف اور غیر جانبدارانہ تحقیقات کروائی جائے۔