گورنر خیبرپختونخوا شاہ فرمان نے کہا ہے کہ زیتون کی کاشت ملکی اقتصادی ترقی اورعوام کو روزگار کی فراہمی کابڑا ذریعہ ہے۔

تفصیلات کے مطابق گورنرخیبرپختونخوا شاہ فرمان کی زیرصدارت زیتون اور بیری کی کاشت سے متعلق جائزہ اجلاس ہوا جس میں زیتون اور بیری کی کاشت کوفروغ دینے سے متعلق اموروتجاویز پرتبادلہ خیال کیا گیا۔

اجلاس میں گورنر کی محکمہ جنگلات اور زراعت کو زیتون کی کاشت کیلئے ضلعی سطح پردرست وتحقیق شدہ ڈیٹا فراہم کرنے جبکہ سرکاری وپرائیویٹ نرسریز سے زیتون کی کاشت کیلئے نرسری اورقلم کاری کیلئے مطلوبہ درست تعداد کی فراہمی کی بھی ہدایت دی۔

گورنرخیبرپختونخوا شاہ فرمان نے اجلاس کی صدارت کرتے ہوئے ہدایت دی کہ زیتون اور بیری کی کاشت کیلئے ہر ضلع سے موزوں میسربنجرزمین کی حقیقی تعداد فراہم کی جائے۔

اس موقع پر گورنرخیبرپختونخوا نے کہا کہ زیتون اور بیری کی کاشت عوامی مفاد کامنصوبہ ہے جس میں کوتاہی کی گنجائش نہیں۔

شاہ فرمان نے یہ بھی کہا کہ موزوں اراضی کے مطابق زیتون کی نرسری لگانے اورقلم کاری کیلئے موثرحکمت عملی ترتیب دی جاسکتی ہے جبکہ زیتون کی نرسری اورقلم کاری زیادہ مقدارمیں درکارہے تاکہ کاشت وسیع رقبہ پرکی جاسکے۔

گورنرخیبرپختونخوا شاہ فرمان نے مزید کہا کہ صوبہ کی زمین زیتون اور بیری کی کاشت کیلئے انتہائی زرخیز ہے جبکہ ایک اندازے کے مطابق صوبہ میں 26 کروڑ زیتون کے پودے لگوائے جاسکتے ہیں۔