وزیر خارجہ شاہ محمود قریشی نے کہا ہے کہ انشاءاللہ پاکستان جلد گرے لسٹ بھی نکل جائے گا۔

تفصیلات کے مطابق وزیر خارجہ شاہ محمود قریشی نے اپنے ایک بیان میں کہا کہ کچھ بیرونی قوتیں پاکستان کو غیر مستحکم کرنے اور انتشار پھیلانے کی کوششیں کررہی ہیں ، پاکستان کو بلیک لسٹ کیا جائے۔

شاہ محمود قریشی نے کہا کہ وہ قوتیں پاکستان کو اندرونی طور پر کمزور کرنا چاہتی ہیں جبکہ یہ قوتیں پاکستان کے اتحاد اور امن کو پارہ پارہ کرنا چاہتی ہیں لہذا ہمیں ایسی قوتوں سے بچنا ہوگا اور ان کا راستہ روکنا ہوگا۔

وزیرخارجہ نے یہ بھی کہا کہ وزیراعظم عمران خان ملک میں کرپشن کے خاتمے اور نظام کی شفافیت اور تبدیلی کیلئے پر عزم ہیں۔

شاہ محمود قریشی کا کہنا تھا کہ حکومت سینیٹ میں اوپن بیلٹ کرکے ایک شفاف نظام کی بنیاد رکھنا چاہتی ہیں، ایف اے ٹی ایف کے حالیہ اجلاس میں پاکستان کے کئے جانے والے اقدامات کو سراہا گیا۔

وزیرخارجہ کا یہ بھی کہنا تھا کہ وزیراعظم پاکستان اسلامی دنیا کے عظیم لیڈر کے طور پر سامنے آرہے ہیں،74سالوں میں پہلی مرتبہ کسی سربراہ مملکت نے عالمی ایوانوں میں اسلام پر بات کی۔

شاہ محمود قریشی نے کہا کہ ہالینڈ میں گستاخانہ خاکوں پر ہم نے آواز بلند کی اور گستاخانہ خاکوں کی نمائش کو رکوایا  جبکہ گستاخانہ خاکے ہوں ، ناموس رسالت پر بات ہویا اسلام کی توہین ہوہماری آواز سب سے آگے اور بلند ہوتی ہے اور پہلی مرتبہ کسی سربراہ مملکت نے اسلام فوبیا کے بڑھتے ہوئے رجحانات کے خلاف آواز بلند کی۔

وزیر خارجہ شاہ محمود قریشی نے مزید کہا کہ وزیراعظم پاکستان ہر عالمی فورم پر دین کی خدمت کررہے ہیں اور اللہ نے ہمیں جو موقع دیا ہے اسلام کی سربلندی کیلئے آواز بلند کررہے ہیں۔