بہاولپور کور کے زیر اہتمام پاک فوج کی ٹریننگ مشقوں کے دوران مقامی اسکولوں، کالجوں اور یونیورسٹی کے500سے زائد طلباء و طالبات اور اساتذہ نے ایک دن چولستان میں بہاولپور کور کے ساتھ گزارا۔

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق”ایک دن فوج کے ساتھـ”پروگرام کے آغاز میں طلباء کو پاک فوج کے جوانوں کی پیشہ ورانہ مہارت سے متعلق ایک عملی مظاہرہ دکھایا جبکہ طلباء نے ٹینک اور اے پی سی کی سواری کی اور پاک فوج کے زیرِ استعمال اسلحہ اور جنگی آلات کا بھی جائزہ لیا۔

آئی ایس پی آر  کے مطابق  اس ایک روزہ پروگرام کا مقصد نوجوان نسل کو پاک فوج کی دفاعی ذمہ داریوں اور پیشہ ورانہ صلاحیت کے بارے میں آگاہ کرنا ہے۔

آئی ایس پی آر نے کہا کہ پروگرام میں طلباء نے ملٹی بیرل راکٹ لانچر کا فائر دیکھا جس کے دورانPAFکے جنگی طیاروں نے بھی حملے کا مظاہرہ کیاجس کو دیکھ کر طلباء کا جوش و جذبہ قابلِ دید تھا۔

آئی ایس پی آر کے مطابق 500 سےزائد طلباو طالبات اور اساتذہ نے پروگرام میں شرکت کی جبکہ پاک فوج کی پیشہ ورانہ صلاحیت اور جذبے کی تعریف کی۔

آئی ایس پی آر کا کہنا ہے کہ طلباء نے پاک فوج کی تعریف کرتے ہوئے مُلکی سالمیت و استحکام کیلئے ہر محاذ پر پاک فوج کے عزم و ایثار کو بے حد سراہا اور فخر کا اظہار کیا۔

آئی ایس پی آر  کا مزید کہنا ہے کہ آخر میں طلباء نے کور کمانڈر بہاولپور  سے ملاقات کی اور پاک آرمی کی پیشہ ورانہ قابلیت کی بے حد تعریف کی۔