سینیٹر شبلی فراز نے کہا ہے کہ صحافیوں کے جان و مال کی حفاظت حکومت کی ذمہ داری ہے۔

تفصیلات کے مطابق سینیٹر شبلی فراز نے پی ایف یو جے کے زیر اہتمام نیشنل سیمینار سے خطاب کرتے ہوئے کہا کہ پی ایف یو جے کے سیمینار میں آکر خوشی ہوئی، پی ایف یو جے کی ایک درخشندہ تاریخ ہے۔

اپنے بیان میں انھوں نے کہا کہ صحافیوں کو حکومت اوراپوزیشن پر بلا امتیاز تنقید کرنی چاہیے۔

شبلی فراز نے یہ بھی کہا کہ میری میڈیا سے ایک ہی درخواست ہے کہ ہمارے اچھے کام پر تنقید لیکن اچھے کام پر پذیرائی کی جائے۔

ان کا کہنا تھا کہ حکومت کی کوشش ہے کہ آزادی اظہار کی اجازت ہو اور میڈیا کے ساتھ تعلقات بہتر ہو جبکہ میری میڈیا نمائندوں سے ملاقات ہوتی رہتی ہے کسی نے بھی انتہا کے خدشات سامنے نہیں رکھے۔

انھوں نے کہا کہ کوئی ادارہ یا سیاسی پارٹی جو وقت کے ساتھ آگے نہ بڑھ سکے وہ پیچھے رہ جاتا ہے، صحافت میں اب نئے دور کے تقاضوں کو بھی مدنظر رکھنا ہوگا۔

شبلی فراز نے کورونا وبا کے دوران صحافیوں کی خدمات کی تعریف کی اور کہا کہ ہم صحافیوں کے جان و مال کے تحفظ کو یقینی بنانا چاہتے ہیں اور صحافیوں کے تحفظ کےلیے اقدامات کررہےہیں۔

سینیٹر شبلی فراز نے مزید کہا کہ جب صحافیوں کو تنخواہ نہیں ملتی تو ہمیں تکلیف ہوتی ہے، ہم صحافیوں کی بروقت تنخواہوں کے حوالے سے بل لے کر آئے لیکن اسے اپوزیشن نے مسترد کردیا۔