وزیرخارجہ مخدوم شاہ محمود قریشی نے کہا ہے کہ مجھے خوشی ہے کہ ہماری زر مبادلہ کی ماہانہ شرح دو ارب ڈالر سے تجاوز کر رہی ہے۔

تفصیلات کے مطابق وزیرخارجہ مخدوم شاہ محمود قریشی کی زیر صدارت وزارت خارجہ میں یورپی ممالک میں تعینات پاکستانی سفراءکے ساتھ معاشی سفارت کاری کے حوالے سے اہم اجلاس ہوا جس میں یورپی ممالک میں تعینات پاکستانی سفراء نے وزیرخارجہ کو معاشی سفارت کاری کے حوالے سے کی گئی کاوشوں پر بریفنگ دی۔

شاہ محمود قریشی نے کہا کہ معاشی سفارتکاری کا مطلب محض ملکی ایکسپورٹ کو بڑھانا نہیں بلکہ یہ معیشت میں بہتری لانے کی ایک جامع حکمت عملی ہے۔

وزیرخارجہ نے یہ بھی کہا کہ مجھے خوشی ہے کہ ہمارے سفارت خانے معاشی سفارتکاری کے حوالے سے اپنی تمام صلاحیتیں بروئے کارلا رہے ہیں اور مثبت نتائج سامنے آرہے ہیں۔

شاہ محمود قریشی کا کہنا تھا کہ وزارتِ خارجہ کے افسران نے معاشی سفارتکاری کو عملی جامہ پہنانے کیلئے جس لگن اور محنت سے کام کیا اس پر میں انہیں مبارکباد پیش کرتا ہوں۔

وزیرخارجہ کا یہ بھی کہنا تھا کہ ہم اپنی جغرافیائی سیاسی ترجیحات کو جغرافیائی معاشی ترجیحات میں بدل رہے ہیں۔

شاہ محمود قریشی نے کہا کہ پاکستان میں معاشی اشارئیے بہتری کا عندیہ دے رہے ہیں،کسی بھی ملک کے پارلیمینٹرینز  رائے عامہ بنانے میں اہم کردار ادا کرتے ہیں لہذا میں آپ کو پارلیمینٹرینز کے ساتھ روابط بڑھانے کی ترغیب دیتا ہوں۔

وزیرخارجہ مخدوم شاہ محمود قریشی نے مزید کہا کہ یورپی ممالک میں تعینات پاکستانی سفراءنے وزیر خارجہ کو یقین دلایا کہ وہ معاشی سفارتکاری کے حوالے سے حصول کو یقینی بنانے کیلئے اپنی بھرپور کوششیں بروئے کار لائیں گے۔

اجلاس میں یورپی ممالک میں تعینات پاکستانی سفراء نے بذریعہ ویڈیو لنک شرکت کی۔