معاون خصوصی برائے سیاسی ابلاغ ڈاکٹر شہباز گِل نے کہا ہے کہ ہار چور کو آج ایک اور “ہار” مبارک ہو۔

تفصیلات کے مطابق معاون خصوصی برائے سیاسی ابلاغ ڈاکٹر شہباز گِل نے بلاول زرداری کے بیان پر ردعمل دیتے ہوئے کہا کہ اپوزیشن کھسیانی بلی کمبھا نوچے کی جیتی جاگتی مثال ہیں۔

 معاون خصوصی برائے سیاسی ابلاغ نے کہا کہ پی ڈی ایم ایک مرتبہ پھر مشترکہ طور پر ذلیل و رسوا ہوئی ہے، یقیناً چور پارٹی میں شکست تسلیم کرنے کی اخلاقی جرات نہیں۔

 ڈاکٹر شہباز گِل نے یہ بھی کہا کہ ریجیکٹڈ لوگ ریجیکٹڈ ووٹوں کا سہارا چاہتے ہیں جبکہ آج ریجیکٹ ووٹوں پر واویلا کرنے والے کل تک اسے ضمیر کی آواز کہتے تھے، ریجیکٹڈ ووٹوں کا رونا رونے والے ڈپٹی چیئرمین کے ووٹ دیکھیں۔

معاون خصوصی برائے سیاسی ابلاغ ڈاکٹر شہباز گِل نے مزید کہا کہ تحریک انصاف کے ڈپٹی چیئرمین نے 54 ووٹ حاصل کئے ہیں اور یہ 54 ووٹ چور پارٹیوں کے منہ پر طمانچہ ہیں۔

خیال رہے کہ حکومتی امیدوار صادق سنجرانی دوبارہ چیئرمین سینیٹ منتخب ہوگئے۔

سابق چیئرمین سینیٹ و حکومتی امیدوار صادق سنجرانی مسلسل دوسری بار چیئرمین سینیٹ منتخب ہوئے ہیں۔

چیئرمین سینیٹ کے عہدے کے لیے حکومتی اتحاد کی جانب سے صادق سنجرانی کا مقابلہ پی ڈی ایم کے مشترکہ امیدوار یوسف رضا گیلانی کے ساتھ ہوا۔

ووٹنگ کے دوران سینیٹ کے 100 میں سے 98 ارکان نے اپنا حق رائے دہی استعمال کیا۔ صادق سنجرانی نے 48 جبکہ یوسف رضاگیلانی نے 42 ووٹ حاصل کیے۔

پی ڈی ایم کے امید وار یوسف رضا گیلانی کے سات ووٹ  جبکہ  صادق سنجرانی کے ایک ووٹ پراعتراض ہوا۔