وزیرخارجہ شاہ محمود قریشی نے تاجکستان روانگی سے قبل اپنے دورے کے حوالے سے  اہم ویڈیو پیغام دیا۔

تفصیلات کے مطابق وزیرخارجہ شاہ محمود قریشی نے اہم ویڈیو پیغام  میں بتایا کہ تاجکستان میں نویں ہارٹ آف ایشیا ءاستنبول پراسیس کی وزراتی کانفرنس منعقد ہو رہی ہے جس کے لیے میں تاجکستان کے دارلخلافہ دوشنبے روانہ ہورہا ہوں۔

شاہ محمود نے کہا کہ آج ترکی  اور ایران کے وزرائے خارجہ سے ملاقات ہوگی جبکہ 31  مارچ کو تاجکستان کے وزیرخارجہ سے بھی باہمی ملاقات ہوگی۔

وزیرخارجہ نے کہا کہ کانفرنس میں پاکستان نے افغانستان میں قیام امن کے لیے جو کردارادا کیا ہے اس کے کلیدی کردار پر بات کرنے کا موقع ملے گا۔

شاہ محمود قریشی نے یہ بھی کہا کہ اس کانفرنس میں افغانستان کے امن اوراستحکام پر بھی تبادلہ خیال ہو گا اور افغان امن عمل کو کیسے آگے لے کرچلنا ہے اس پر بھی سیر حاصل بحث ہو گی۔

انہوں نے کہا کہ اس کانفرنس میں خطے کے 15 اہم ممالک،16 سپورٹنگ ممالک اور 12 اہم بین الاقوامی تنظیمیں شرکت کررہی ہیں۔ ان ملاقاتوں میں پاکستان کے کردار کو پیش کرنے کا موقع ملے گا اور یہ وہ ممالک  ہیں جو پاکستان کے کردار کا اعتراف کرتے ہیں ۔

شاہ محمود قریشی نے بتایا کہ آزربائیجان اورقازقستان  کے وزرائے خارجہ سے مل کرافغانستان  میں امن عمل ،علاقائی اور عالمی مسائل پر بھی تبادلہ خیال کا موقع ملے گا ۔

وزیر خارجہ شاہ محمود قریشی نےاس اہم ویڈیو پیغام میں مزید کہا کہ امید کرتا ہوں پاکستان کے کردار کا اعتراف بھی کیا جائے گا اور پاکستان کے خدشات پر توجہ بھی دی جائے گی۔