مسلم لیگ ن کی نائب صدر مریم نواز نے کہا ہے کہ کل ڈی چوک پر لیگی رہنماؤں پر ہونے والے حملے کی بڑی قیمت چکانا پڑے گی، آپ دو تھپڑ ماریں گے تو جواب میں ہم 10 ماریں گے۔

تفصیلات کے مطابق مسلم لیگ ن کی نائب صدر مریم نواز نے مسلم لیگ ن کے اجلاس کے بعد میڈیا سے گفتگو کرتے ہوئے ڈی چوک پر ہونے والی بدتمیزی کا بدلہ لینے کا اعلان کردیا۔

مسلم لیگ ن کی نائب صدر نے کہا کہ ن لیگ کے مشاورتی اجلاس میں لانگ مارچ ،ڈسکہ الیکشن کراچی کی خالی نشست کے بارے میں مشاورت ہوئی جبکہ چیئرمین سینٹ کے انتخاب پر بھی بات چیت ہوئی۔

مریم نواز نے یہ بھی کہا کہ کل جوبد تمیزی کی گئی وہ ہر مسلم لیگی پرقرض ہے اور ہم قرض چکانا اچھے طریقے سے جانتے ہیں، آپ دو تھپڑ ماریں گے تو جواب میں ہم 10 ماریں گے۔

مسلم لیگ ن کی نائب صدر کا کہنا تھا کہ کل ڈی چوک پر لیگی رہنماؤں کے ساتھ طوفانِ بدتمیزی مچایا گیا، مریم اورنگزیب، شاہد خاقان عباسی، احسن اقبال اور مصدق ملک پر ہونے والے حملے کی بڑی قیمت چکانا پڑے گی کیونکہ ہم اس معاملے کو ہلکا نہیں لیں گے۔

مریم نواز کا یہ بھی کہنا تھا کہ کل قومی اسمبلی میں اراکین کی گردنوں پر تلواریں رکھ کر ووٹ لیا گیا جبکہ اب اس کی کوئی قانونی اور سیاسی حیثیت نہیں ہے۔

مسلم لیگ ن کی نائب صدر نے کہا کہ تحریک انصاف کے اراکین اسمبلی ہم سے رابطوں میں ہیں، دو اراکین قومی اسمبلی عمران خان کو ووٹ دینے کے لیے راضی نہیں تھے۔

مریم نواز نے یہ بھی کہا کہ ڈرون کیمروں سےایک ایک ممبرکی نگرانی کی گئی، جن لوگوں نے گیلانی کو ووٹ دیا کل اُن کا فیصلہ زبردستی تبدیل کروایا گیا۔

مسلم لیگ ن کی نائب صدر مریم نواز نے مزید کہا کہ کراچی کے حلقے این اے 249 سے مسلم لیگ نے مفتاح اسماعیل کو ٹکٹ دینے کا فیصلہ کیا ہے جبکہ پنجاب میں اگلی حکومت مسلم لیگ ن کی آئے گی۔