پاک سرزمین پارٹی کے سربراہ مصطفیٰ کمال نے کہا ہے کہ بلوچستان میں حکومت نام کی کوئی چیز نہیں ہے۔

تفصیلات کے مطابق پاک سرزمین پارٹی کے سربراہ مصطفیٰ کمال نے کوئٹہ میں جلسے سے خطاب کرتے ہوئے کہا کہ پاکستان میں ہر جگہ نئے منصوبوں کی بات ہوتی ہے لیکن بلوچستان میں نہیں، بلوچستان اسمبلی میں ایک رات میں ساری وفاداری بدل جاتی ہے۔

مصطفیٰ کمال نے کہا کہ صدیوں سے کراچی تا کوئٹہ روڈ کو ڈبل نہیں کیا جا رہا جبکہ بلوچستان میں کوئی نئی یونیورسٹی، تعلیمی نظام اور نہ کوئی اسپتال ہے۔

پاک سرزمین پارٹی کے سربراہ کا کہنا تھا کہ بلوچستان کے ناراض بھائیو! یہ ریاست ہماری ہے، میں جانتا ہوں آپ کے ساتھ زیادتی ہوئی میں اس کا ازالہ کروں گا۔

مصطفیٰ کمال کا یہ بھی کہنا تھا کہ ریاست پاکستان چلانے والوں سے پوچھتا ہوں آپ تو مجبور نہیں، بلوچستان کے سردار وزیر اور وزیر اعلیٰ بنے، عوام کو کیا دیا گیا، جب ان سے عہدہ چھنتا ہے تو یہ نوجوانوں کو ریاست کے خلاف کھڑا کرتے ہیں۔

پاک سرزمین پارٹی کے سربراہ مصطفیٰ کمال کا مزید کہا کہ ریاست سے کہتا ہوں کہ بلوچستان کے غریب عوام سے ڈیل کریں، عوام کو براہ راست حکمرانی دی جائے، مقامی حکومتوں کو اختیارات دیے جائیں، بلوچستان کے مقامی لوگوں کو لیڈر بننے دیا جائے۔