تحریک انصاف نے یوسف رضا گیلانی کی نااہلی کے لئے الیکشن کمیشن کو باضابطہ درخواست دے دی۔

 تفصیلات کے مطابق سینیٹ الیکشن میں خریداری اور ووٹ خراب کرنے کی متعدد آڈیوز اور ویڈیوز سامنے آنے پر نہ صرف الیکشن کمیشن نے نوٹس لے لیا ہے بلکہ تحریک انصاف نے یوسف رضا گیلانی کی نااہلی کے لئے الیکشن کمیشن میں درخواست دے دی ہے۔

درخواست تحریک انصاف کے ارکان اسمبلی فرخ حبیب اور کنول شوزب کی طرف سے دی گئی ہے۔

درخواست دینے کے بعد میڈیا سے گفتگو میں فرخ حبیب کا کہنا تھا کہ یوسف گیلانی جو خود امیدوار ہیں وہ ووٹرزپر اثرانداز ہورہے ہیں اور وہ دھاندلی کروانا چاہتے۔

فرخ حبیب نے کہا کہ ضمیروں کے سودے کررہے ہیں الیکشن قوانین کے تحت ان کو ڈس کوالیفائی کیا جائے یہ ہماری استدعا ہے جو ہم نے تحریری طورپر بھی جمع کروا رہے ہیں۔

تحریک انصاف کے ارکان اسمبلی فرخ حبیب نے مزید کہا کہ الیکشن کمیشن نے ویڈیو کا نوٹس لے کر اچھا کیا مگر کیا یہ کافی ہے الیکشن کمیشن خریدوفروخت کرنے والے امیدوار کو نااہل قرار دے۔

اس موقع پر حکومتی رکن کنول شوزب نے کہا کہ الیکشن عمل کی شفافیت کو یقینی الیکشن کمیشن کی ذمہ داری ہے اور یہی سپریم کورٹ نے کہا ہےجو الیکشن ہونے جارہا ہے اس جو بے ضابطگیاں سامنے آئی ہیں الیکشن کمیشن اس کا بھرپور نوٹس لے۔

کنول شوزب نے یہ بھی کہا کہ یوسف گیلانی کے بیٹے جو خود ایم پی اے ہیں وہ ان کے کہنے پر لوگوں کے ضمیروں کی سودے بازی کررہے ہیں۔

حکومتی رکن کنول شوزب نے مزید کہا کہ یوسف رضاگیلانی کے پاس کوئی اخلاقی جواز باقی نہیں رہ گیا کہ وہ اس الیکشن کو لڑیں، میرے خیال میں یوسف گیلانی کو الیکشن کمیشن کے ایکشن سے قبل خود ہی مستعفی ہوجانا چاہیے۔