پاکستان شوبز انڈسٹری کی سینئر اداکارہ سکینہ سموں کی تنقید پر اداکارہ ریشم کا ردعمل سامنے آگیا۔

 اداکارہ ریشم نے ایک نجی خبر رساں ادارے سے گفتگو کرتے ہوئے کہا کہ ’ایسا مکمن ہوسکتا ہے کہ میں کوئی بھی اعزاز حاصل کرنے کی حقدار نہ ہوں لیکن جس طرح کی رائے ہمارے سینئر اداکار اپنے جونیئر فنکاروں کے لیے رکھ رہے ہیں کیا وہ درست ہے؟‘

مزید پڑھیں

علی ظفر، ریشم اور ہمایوں سعید سمیت فنکاروں کے لیے قومی اعزازات

یومِ پاکستان کے موقعے پر فن و ادب اور شوبز سے تعلق...

اداکارہ ریشم نے کہا کہ ’سینئر اداکار تو اپنے جونئیر اداکار کی محنت کو سراہاتے ہیں، اُن کے لیے اپنا دل بڑا رکھتے ہیں لیکن یہاں تو سینئر کے ہاتھوں جونیئر اداکاروں کی جدوجہد اور محنت کو نقصان پہنچایا جارہا ہے۔‘

اُنہوں نے سینئر اداکارہ سکینہ سموں کو دُعا دیتے ہوئے کہا کہ ’اللّٰہ تعالیٰ سکینہ جی کو بہت سے اعزازات سے نوازے۔‘

ریشم نے مزید کہا کہ ’جب کوئی انسان کسی دوسرے انسان کو نیچے دکھانے کی کوشش کرتا ہے تو حقیقت میں وہ دوسروں کے سامنے اپنا کردار ظاہر کر رہا ہوتا ہے۔‘

واضح رہے کہ پاکستان شوبز انڈسٹری کی سینئر اداکارہ سکینہ سموں نے گلوکار علی ظفر اور اداکارہ ریشم کو صدارتی اعزاز ملنے پر برہمی کا اظہار کیا تھا۔

حال ہی میں دیے جانے والے انٹرویو میں سکینہ سموں نے گفتگو کرتے ہوئے صدارتی ایوارڈز پر اظہارِ خیال کیا تھا۔

  اداکارہ نے کہا تھا کہ ’مجھے صدارتی اعزاز حاصل کرنے کے مقام تک پہنچنے کے لیے 40 سال لگے۔

انہوں نے کہا تھا کہ مجھے یہ دیکھ کر بہت افسوس ہوا کہ حکومت پاکستان نے علی ظفر اور ریشم جیسے فنکاروں کو اتنے بڑے صدارتی اعزاز سے نوازا۔‘

سکینہ سموں نے کہا تھا کہ ’میری نظر میں علی ظفر اور ریشم صدارتی اعزاز حاصل کرنے کے حقدار نہیں۔‘

اداکارہ نے مزید کہا تھا کہ ’میرے خیال میں صدارتی تمغہ برائے حُسنِ کارکردگی کا انتخاب آج کل اس قدر آسان ہوگیا ہے کہ اس کے نتیجے میں کئی ایسی شخصیات کو نظر انداز کیا جارہا ہے جو اپنی تمام زندگی شوبز میں وقف کرچکی ہیں۔‘

واضح رہے کہ گزشتہ دنوں یوم پاکستان 23 مارچ کے روز حکومت پاکستان کی جانب سے مختلف شعبوں میں نمایاں کارکردگی کی حامل شخصیات کو سول اور صدارتی ایوارڈز سے نوازا گیا تھا۔