وزیراعلیٰ پنجاب کی معاون خصوصی برائے اطلاعات ڈاکٹر فردوس عاشق اعوان نے کہا ہے کہ ادارے پاکستان کا وقار ہیں اور ہم اداروں کی عزت پر حرف نہیں آنے دیں گے۔

تفصیلات کے مطابق وزیراعلیٰ پنجاب کی معاون خصوصی برائے اطلاعات ڈاکٹر فردوس عاشق اعوان نے اپنے ایک بیان میں کہا کہ جعلی راجکماری، سندھ کاشہزادہ اور مولانا چیئرمین سینیٹ کے الیکشن کو متنازعہ بنانے کی سازش کررہے ہیں۔

معاون خصوصی برائے اطلاعات نے کہا کہ اداروں کا احترام ہم سب پر لازم ہے ، اداروں پر انگلیاں اٹھانے والوں کو شرم آنی چاہیے۔

ڈاکٹر فردوس عاشق اعوان نے یہ بھی کہا کہ پیسہ لگا کر ایک سیٹ جیتنے والا کرپٹ ٹولہ اداروں پر الزام تراشی کرنے سے باز رہے۔

معاون خصوصی برائے اطلاعات کا کہنا تھا کہ گھٹیا سیاست کرنا جعلی راجکماری اور کنیز اول اور کنیز دوئم کا وطیرہ ہے۔

 ڈاکٹر فردوس عاشق اعوان کا یہ بھی کہنا تھا کہ سیاسی بہروپیوں کا ہر حربہ ناکام رہا ہے جبکہ سندھ کا شہزادہ عدم اعتماد کا شوشہ لے کر پنجاب سے بھاگ چکا ہے۔

فردوس عاشق اعوان نے کہا کہ مرکز میں ناکامی کے بعد اس ٹولے نے پنجاب پر نظریں جمائیں ، مرکز کے گیڈر پنجاب میں بھی گیڈرہی ثابت ہوئے ہیں۔

وزیراعلیٰ پنجاب کی معاون خصوصی برائے اطلاعات ڈاکٹر فردوس عاشق اعوان نے مزید کہا کہ حکومتی اتحادی ہمارے ساتھ ہیں اور وزیراعلیٰ عثمان بزدار کو وزیراعظم عمران خان کا اعتماد حاصل ہے۔