وزیرخارجہ شاہ محمود قریشی نے کہا ہے کہ پاکستان افغانستان میں قیام امن کیلئے اپنا مصالحانہ کردار خلوص نیت سے نبھاتا رہے گا۔

وزیرخارجہ شاہ محمود قریشی کی دشنبے میں منعقدہ نویں ہارٹ آف ایشیاء استنبول پراسس اجلاس کے موقع پر افغان ہم منصب محمد حنیف آتمر سے ملاقات ہوئی جس میں دو طرفہ تعلقات اور افغان امن عمل سمیت باہمی دلچسپی کے امور پر گفتگو ہوئی۔

ملاقات میں دونوں وزرائے خارجہ نے ہارٹ آف ایشیاء استنبول پراسس اجلاس کے انعقاد کو سراہتے ہوئے اسے مثبت سمت میں اہم قدم قرار دیا۔

ملاقات میں وزیرخارجہ شاہ محمود قریشی نے کہا کہ پاکستان افغانستان کے ساتھ تاریخی اور دیرینہ برادرانہ تعلقات کو خصوصی اہمیت دیتا ہے۔

وزیرخارجہ نے کہا کہ پاکستان سمجھتا ہے کہ خطے میں امن و امان کا انحصار افغانستان میں مستقل قیام امن کے ساتھ منسلک ہے۔

شاہ محمود قریشی نے یہ بھی کہا کہ بین الافغان مذاکرات کی صورت میں افغان قیادت کے پاس قیام امن کا ایک نادر موقع ہے اور آج افغان امن عمل میں پاکستان کے مصالحانہ کردار کو عالمی سطح پر سراہا جارہا ہے۔

وزیرخارجہ شاہ محمود قریشی نے مزید کہا کہ فریقین کو اس موقع سے فائدہ اٹھاتے ہوئے ان مذاکرات کو نتیجہ خیز بنانے کیلئے سنجیدہ کوششیں کرنا ہوں گی۔

ملاقات میں افغان وزیر خارجہ نے افغان امن عمل میں پاکستان کی مخلصانہ کاوشوں کو سراہتے ہوئے پاکستان کی قیادت اور وزیر خارجہ مخدوم شاہ محمود قریشی کا خصوصی شکریہ ادا کیا۔