پاکستان شوبز انڈسٹری کی سینئر اداکارہ شائستہ جبین نے شادی نہ کرنے کی وجہ بتا دی۔

سینئر اداکارہ شائستہ جبین ایک نجی ٹی وی چینل کے پروگرام میں بطورِ مہمان شریک ہوئی تھیں جہاں میزبان نے اداکارہ سے مختلف سوالات پوچھے۔

دورانِ پروگرام میزبان نے اداکارہ شائستہ جبین سے سوال کیا کہ آپ نے ابھی تک شادی کیوں نہیں کی؟

میزبان کی جانب سے کیے جانے والے سوال پر اداکارہ نے جواب دیا کہ’میں نے ابھی تک جتنی بھی شادیاں دیکھی ہیں اُن میں سے چند ہی لوگوں کی شادی شدہ زندگیاں خوشحال گُزر رہی ہیں۔‘

شائستہ جبین نے کہا کہ ’کہیں شوہر خراب ہے تو کہیں بیوی، لوگوں کی ناکام شادی شدہ زندگیاں دیکھ کر میں نے شادی نہ کرنے کا فیصلہ کیا۔‘

اداکارہ نے مزید کہا کہ ’یہاں تک کہ میں اپنے بھائی کی ازدواجی زندگی دیکھ کر بھی اُسے یہی کہتی ہوں کہ صرف تُم لوگوں کی ہی وجہ سے ہی میں نے شادی نہیں کی۔‘

دوسری جانب اداکارہ نے شوبز میں اپنی انٹری کے حوالے سے کہا کہ ’میں نے بچپن میں ہی اپنے والد کو کھودیا تھا اور اُن حالات میں فیملی کو سپورٹ کرنے کے لیے شوبز کا رُخ کیا۔‘

شائستہ جبین نے بتایا کہ ’میں اپنے خاندان کی پہلی اور آخری خاتون ہوں جس کا تعلق شوبز سے ہے کیونکہ میرے خاندان میں اس کام کو اچھا نہیں سمجھا جاتا تھا اور کوئی مجھے اپنا رشتہ دار بھی تسلیم نہیں کرتا تھا۔‘

اداکارہ نے کہا کہ ’شاید اب کوئی مجھے اپنا رشتہ دار کہہ بھی دیتا ہو لیکن ماضی میں کوئی قبول نہیں کرتا تھا کہ میں اُن کی رشتہ دار ہوں۔‘

واضح رہے کہ شائستہ جبین نے اپنے فنی کیرئیر کی ابتدا اسٹیج ڈراموں سے کی تھی جس کے بعد انہیں ٹی وی ڈراموں میں بھی کاسٹ کیا جانے لگا۔