چیئرمین پی ایس پی مصطفیٰ کمال نے کہا ہے کہ جب تک جلسے کی اجازت نہیں مل جاتی ایوب اسٹیڈیم میں رہوں گا۔

تفصیلات کے مطابق چیئرمین پی ایس پی مصطفیٰ کمال نے میڈیا سے گفتگو کرتے ہوئے کہا کہ کوئٹہ کے تمام جلسے ایوب اسٹیڈیم میں ہوتے ہیں ایک ماہ قبل اسٹیڈیم میں جلسے کی اجازت ملی تھی لیکن دودن پہلے کسی وجہ سے اجازت نامہ منسوخ کیا گیا ہم درخواست کرتے ہیں ہمیں جلسے کی اجازت دی جائے ہم قانون پسند جمہوری لوگ ہیں۔

مصطفیٰ کمال نے گفتگو کے دوران کہا کہ ہم نے ساری تیاری کرلی ہے ہمیں اجازت دی جائےیہاں کوئی متبادل جگہ ہے ہی نہیں کہ جہاں جلسہ کریں گے۔

چیئرمین مصطفیٰ کمال نے کہا کہ پورا شہر پاک سرزمین پارٹی کے جھنڈوں سے سجا ہوا ہے اور پی ایس پی یہاں کے لوگوں کیلئے آواز بلند کررہی ہے۔

پی ایس پی کے چیئرمین نے  یہ بھی کہا کہ 3 روز سے وزیراعلیٰ بلوچستان سے رابطہ کررہا ہوں مگر وہ کوئی جواب نہیں دے رہے،امید ہے انتظامیہ اور صوبائی حکومت ہماری بات مانے گی۔

 چیئرمین پی ایس پی مصطفیٰ کمال نے مزید کہا کہ بلوچستان میں ظلم ہے لوگ پریشان ہیں، وزیراعلیٰ بلوچستان جام کمال کو ذاتی طور پر فون کیا تھا  مگر فون نہیں اُٹھایا ، ان کا یہ اقدام جمہوری اور اخلاقی روایات کے منفی ہے کیونکہ جب وہ میرا فون ہی نہیں اُٹھاسکتے توعام آدمی کی آواز کیا سُنیں گے۔