وزیراعلیٰ پنجاب سردار عثمان بزدار نے کہا ہے کہ پاک وطن کی مٹی کا قرض اتارنے کیلئے سب کو ذاتی اختلافات کو دفن کرنا پڑے گا۔

تفصیلات کے مطابنق وزیراعلیٰ پنجاب سردارعثمان بزدار نے اپنے ایک بیان میں کہا کہ یوم پاکستان پر ذاتی اختلافات بھلا کر سب کو وطن عزیز کے لئے سوچنا ہوگا۔

سردارعثمان بزدار نے کہا کہ قومی مفادات کے سامنے سیاسی،گروہی،لسانی اورمذہبی اختلافات کی کوئی وقعت نہیں۔

وزیراعلیٰ پنجاب کا کہنا تھا کہ آج وطن کی مٹی ہم سے اتحاد،اتفاق اوریکجہتی کا تقاضا کررہی ہے، پاک وطن کی مٹی کا قرض اتارنے کیلئے سب کو ذاتی اختلافات کو دفن کرنا پڑے گا۔

سردارعثمان بزدار کا یہ بھی کہنا تھا کہ قرار داد پاکستان کی لاج رکھتے ہوئے ملک کو ایسی فلاحی اسلامی ریاست بنانا ہے جہاں ہر شہری کو بلاامتیاز رنگ و نسل آگے بڑھنے کے یکساں مواقع حاصل ہوں-

وزیراعلیٰ پنجاب نے کہا کہ قرار داد پاکستان والے جذبے کو زندہ کر کے ہم منزل حاصل کرسکتے ہیں جبکہ پاکستان کو آگے لے کر جانا ہے تو محنت، دیانت، صداقت اورامانت کے راستے پر چلنا ہوگا۔

سردارعثمان بزدار نے یہ بھی کہا کہ کورونا کے باعث ہم سب کو احتیاط کا دامن ہاتھ سے نہیں چھوڑنا چاہیے، کورونا کی تیسری لہر خطرناک صورتحال اختیار کررہی ہے۔

وزیراعلیٰ پنجاب سردارعثمان بزدار نے مزید کہا کہ پنجاب میں گزشتہ 24 گھنٹے میں کورونا کے1863 نئے مریض سامنے آئے جبکہ پنجاب میں اب تک5980 کورونا کے مریض جاں بحق ہو چکے ہیں۔