سندھ حکومت کے ترجمان مرتضی وہاب نے کہا ہے کہ سندھ میں اس وقت کورونا وائرس کے پھیلاؤ میں اتنی شدت نہیں ہے۔

تفصیلات کے مطابق سندھ حکومت کے ترجمان مشیر  قانون ، ماحولیات و ساحلی ترقی بیرسٹر مرتضی وہاب نے اپنے ایک بیان میں کہا کہ وزیراعلیٰ سندھ مراد علی شاہ نے این سی سی کے اجلاس میں بین الصوبائی نقل و حرکت پر دو ہفتے کی پابندی کی تجویز دی۔

سندھ حکومت کے ترجمان نے کہا کہ وزیراعلیٰ سندھ مراد علی شاہ کی تجاویز صوبے سمیت ملک بھر کے عوام کے بہتر مفاد میں ہیں۔

مرتضی وہاب نے یہ بھی کہا کہ وزیراعظم کی طرف سے اس تجویز کو رد نہیں کیا گیا، وفاقی وزیر اسد عمر نے کہا کہ اس ایشو کو کل ہونے والے این سی او سی کے ایجنڈے پر رکھا گیا ہے۔

سندھ حکومت کے ترجمان کا کہنا تھا کہ وزیراعلیٰ سندھ نے اجلاس میں کہا کہ کورونا وائرس سے پنجاب اور خیبر پختون خواہ اس وقت زیادہ متاثر ہیں، وزیراعلیٰ سندھ کی تجویز پر حتمی فیصلہ کل کے این سی او سی کے اجلاس میں کیا جائیگا۔

 مرتضی وہاب کا یہ بھی کہنا تھا کہ بین الصوبائی پابندی سے سندھ سمیت بلوچستان کے عوام کو محفوظ بنایا جاسکتا ہے، بین الصوبائی نقل و حرکت اور ٹرانسپورٹ کو پچھلے برس بھی بند کیا جا چکا ہے جسکے بہتر نتائج برآمد ہوئے تھے۔

سندھ حکومت کے ترجمان مرتضی وہاب کا مزید کہنا تھا کہ وزیراعلیٰ سندھ نے اجلاس میں ویکسینیشن کی رفتار کو بھی تیز کرنے کی تجویز دی کہ ویکسینیشن کے عمل کو ہر عمر کے افراد کے لئے اوپن کیا جائے۔