وزیر اعلیٰ پنجاب سردار عثمان بزدار نے کہا ہے کہ صوبے کے تمام شہروں کی یکساں ترقی ہمارا عزم ہے۔

تفصیلات کے مطابق وزیر اعلیٰ پنجاب سردار عثمان بزدار سے گوجرانوالہ سے تعلق رکھنے والے مسلم لیگ(ن) کے ایم پی اے چوہدری اشرف علی انصاری کی ملاقات ہوئی جس میں باہمی دلچسپی کے امور، گوجرانوالہ شہر کے مسائل کے حل اور دیگر معاملات پر بات چیت کی گئی۔

ملاقات میں عثمان بزدار نے کہا کہ وزارت اعلیٰ عوام کی خدمت کے لئے وقف ہے، منتخب نمائندوں کے مسائل حل کرنا میری ذمہ داری ہے۔

وزیر اعلیٰ پنجاب نے یہ بھی کہا کہ اراکین اسمبلی میرے ساتھی ہیں، عوام کے مسائل حل کرنے کے لئے ہر وقت دروازے کھلے رکھتے ہیں۔

عثمان بزدار کا کہنا تھا کہ گوجرانوالہ شہر کے لئے اربوں روپے کے خصوصی پیکیج کا اعلان کیا ہے، گوجرانوالہ کے ترقیاتی پیکیج کی خود مانیٹر نگ کروں گا۔

وزیر اعلیٰ پنجاب نے کہا کہ گوجرانوالہ کے ترقیاتی منصوبوں کو بروقت پایہ تکمیل تک پہنچایا جائے گا۔

سردار عثمان بزدار نے یہ بھی کہا کہ اپوزیشن کا منفی بیانیہ عوام نے مسترد کردیا ہے، پی ڈی ایم مکافات عمل کا شکار ہو کر ٹوٹ چکی ہے۔

وزیر اعلیٰ پنجاب سردار عثمان بزدار کا مزید کہنا تھا کہ پی ڈی ایم بے سمت دوڑنے والا سیاسی ہجوم ہے، پاکستان کے عوام آر پار کے نہیں بلکہ خدمت کی سیاست چاہتے ہیں، آر پار کے دعویداروں کی منفی سیاست خود آر پار ہوچکی ہے۔

مسلم لیگ(ن) کے ایم پی اے چوہدری اشرف علی انصاری نے کہا کہ گوجرانوالہ کے عوام خصوصی ترقیاتی پیکیج پر آپ کے شکر گزار ہیں، آپ نے اربوں روپے کا ڈویلپمنٹ پیکیج دیکر گوجرانوالہ کے لوگوں کے دل جیت لئے ہیں۔

چوہدری اشرف علی انصاری نے مزید کہا کہ آپ کی قیادت پر بھرپور اعتماد ہے، آپ کی قیادت میں گوجرانوالہ ترقی کرے گا اور عوام کے مسائل حل ہو ں گے۔