چیئرمین سینیٹ صادق سنجرانی نے کہا ہے کہ سرمایہ کاروں کے ساتھ زیادتی نہیں ہونے دیں گے۔

تفصیلات کے مطابق سابق فاٹا سے تعلق رکھنے والے40 رکنی تجارتی وفد کی چیئرمین سینیٹ محمد صادق سنجرانی سے پارلیمنٹ ہاؤس میں ملاقات ہوئی جس میں وفد نے چیئرمین سینیٹ کو سابق فاٹا میں سرمایہ کاری اور کاروبار ی سرگرمیوں میں درپیش مسائل سے آگاہ کیا گیا۔

ملاقات میں تجارتی وفد نے کہا کہ فیڈرل بورڈ آف ریونیو ہمیں قانون کے مطابق سہولت اور رعائت دینے کی بجائے مسلسل تنگ کر رہا ہے جس کی وجہ سے فاٹا کے انضمام کا ہمیں فائدہ ہونے کی بجائے نقصان ہو رہا ہے۔

تجارتی وفد نے مزید کہا کہ صنعتوں سے وابستہ کاروباری طبقے کے بینک اکاؤنٹس منجمند کر دیئے گئے ہیں۔

ملاقات میں چیئرمین سینیٹ صادق سنجرانی نے کہا کہ وزیراعظم پاکستان نے بھی متعدد مواقع پر سابق فاٹا میں تجارتی سرگرمیوں کے فروغ اور صنعتوں کی ترقی کیلئے متعلقہ وزارتوں کو رعائت دینے کی ہدایت کی ہے۔

چیئرمین سینیٹ نے کہا کہ حکومت کا مقصد سابق فاٹا کے علاقوں کو ملک کے دیگر علاقوں کی طرز پر ترقی اور روزگار کے مواقع فراہم کرنا ہے۔

صادق سنجرانی نے یہ بھی کہا کہ سابق فاٹا کے سرمایہ کار اور تاجر اپنی توجہ کاروباری سرگرمیوں کو فروغ دینے اور روزگار کے مواقع پیدا کرنے پر مرکوز رکھیں۔

چیئرمین سینیٹ صادق سنجرانی نے تجارتی وفد کو یقین دہانی کرائی کہ سابق فاٹا کے لئے دی گئی چھوٹ پر عملدرآمد کرایا جائے گا اور انکے تمام مسائل کو ترجیحی بنیادوں پر حل کیا جائے گا۔