امیرجماعت اسلامی سراج الحق کا کہنا ہے کہ پی ٹی آئی کی حکومت میں ملک مثبت تبدیلی کے بجائے مہنگائی کے سونامی کی زد میں ہے، عوام کا جینا مشکل لیکن وزیراعظم قوم کو نہ گھبرانے کی تسلیاں دے رہے ہیں۔

تفصیلات کے مطابق سراج الحق کا کہنا ہے کہ ملک کو سو دن میں ٹھیک کرنے کے وعدے 1100 دنوں کے بعد بھی پورے نہیں ہوئے، مہنگائی کی شرح میں اضافہ حکومت کی ناکام پالیسوں کا منہ بولتا ثبوت ہے۔

امیر جماعت اسلامی نے کہا کہ رمضان المبارک کے قریب آتے ہی ذخیرہ اندوزوں نے عوام کاخون نچوڑنا شروع کردیا ہے، یوٹیلٹی اسٹورز پرمہنگی چیزیں دیکھنے کو مل رہی ہیں۔

انہوں نے کہا کہ اسٹیٹ بینک آرڈنینس سے متعلق ہم نے 8 اپریل کو اسلام آباد میں گول میز قومی کانفرنس بلائی ہے، حکومت نے فیصلہ واپس نہ لیا تو گو آئی ایم ایف گو تحریک کا آغاز کریں گے۔

سراج الحق کا کہناتھا کہ جماعت اسلامی اللہ کا نظام چاہتی ہے، جماعت اسلامی اس وقت واحد اور بہترین آپشن ہے۔