پاکستان شوبز انڈسٹری کے معروف اداکار و میزبان فیصل قریشی نے عالمی وبا کورونا وائرس کی بدترین صورتحال سے دوچار بھارتی عوام کے لیے سوشل میڈیا پر خصوصی پیغام جاری کر دیا ہے۔

فیصل قریشی نے سماجی رابطے کی ویب سائٹ ٹوئٹر پر ٹوئٹ کرتے ہوئے لکھا کہ ’بھارت میں کورونا وائرس کی بےقابو صورتحال کے بارے میں سُن کر بہت افسوس ہوا۔‘

Hearing of an alarming situation in India but touched to see #PakistanStandsWithIndia trending. You are constantly in our prayers India. Humanity is the biggest religion.

— Faysal Quraishi (@faysalquraishi) April 24, 2021

اداکار نے لکھا کہ ’بھارت کے اس مشکل وقت میں پاکستانیوں کی جانب سے یہ ہیش ٹیگ چلانا کہ پاکستان بھارت کے ساتھ کھڑا ہے، اس نے میرا دل چُھولیا۔‘

بھارتی عوام سے مخاطب ہوتے ہوئے فیصل قریشی نے لکھا کہ ’آپ ہماری تمام دُعاؤں میں شامل ہیں۔‘

فیصل قریشی نے مزید لکھا کہ ’انسانیت ہی سب سے بڑا مذہب ہے۔‘

بھارت میں کورونا وائرس بھیانک ہوگیا، آکسیجن کے لیے ترستے شہریوں کی نبض ڈوبنے لگی، اموات اور مریضوں کے خوفناک ریکارڈ بننے لگے۔

چوبیس گھنٹوں میں 3 لاکھ 44 ہزار سے زیادہ نئے مریض سامنے آگئے، جبکہ 26 سو کی سانس کی ڈور ٹوٹ گئی۔

بھارت کے اسپتالوں میں مریضوں کے لیے بستر، آکسیجن، ڈاکٹر، دوا سب کم پڑگئے۔

جان سے جانے والوں کے لیے شمشان گھاٹوں میں لکڑیاں، قبرستانوں میں جگہ ختم ہوگئی، میتوں کو اجتماعی طور پر سپرد خاک کرنے کی نوبت آگئی ہے۔

واضح رہے کہ بھارت کے اس مشکل وقت میں پاکستانیوں کی جانب سے ٹوئٹر پر ہیش ٹیگ PakistanStandsWithIndia چلایا جارہا ہے۔

پاکستانی عوام سمیت دیگر نامور شخصیات بھارت سے اظہارِ یکجہتی کرتی نظر آرہی ہیں۔